کیا جانیے منزل ہے کہاں جاتے ہیں کس سمت

کیا جانیے منزل ہے کہاں جاتے ہیں کس سمت

بھٹکی ہوئی اس بھیڑ میں سب سوچ رہے ہیں

بھیگی ہوئی اک شام کی دہلیز پہ بیٹھے

ہم دل کے سلگنے کا سبب سوچ رہے ہیں

ٹوٹے ہوئے پتوں سے درختوں کا تعلق

ہم دور کھڑے کنج طرب سوچ رہے ہیں

بجھتی ہوئی شمعوں کا دھواں ہے سر محفل

کیا رنگ جمے آخر شب سوچ رہے ہیں

اس لہر کے پیچھے بھی رواں ہیں نئی لہریں

پہلے نہیں سوچا تھا جو اب سوچ رہے ہیں

ہم ابھرے بھی ڈوبے بھی سیاہی کے بھنور میں

ہم سوئے نہیں شب ہمہ شب سوچ رہے ہیں

kya janiye manzil hai kahan jate hain kis samt

bhatki hui is bhir mein sab soch rahe hain

bhigi hui ik sham ki dahliz pe baithe

ham dil ke sulagne ka sabab soch rahe hain

tute hue patton se darakhton ka taalluq

ham dur khare kunj-e-tarab soch rahe hain

bujhti hui shamon ka dhuan hai sar-e-mahfil

kya rang jame akhir-e-shab soch rahe hain

is lahr ke pichhe bhi rawan hain nai lahren

pahle nahin socha tha jo ab soch rahe hain

ham ubhre bhi dube bhi siyahi ke bhanwar mein

ham soe nahin shab hama shab soch rahe hain