کیا دم نزع کوئی اور تمنا کرتے

کیا دم نزع کوئی اور تمنا کرتے

جب تلک دم نہ نکلتا اسے دیکھا کرتے

درد دوری کا بجز مرگ نہیں کوئی علاج

ایسے بیمار کی ہم کوئی دوا کیا کرتے

ایسے بھولے کہ کبھی پھر کے نہ پوچھا تم نے

کچھ تو اے راحت جاں پاس وفا کا کرتے

جور سب ہم نے سہے جتنے کیے گردوں نے

دوریٔ یار کو کس طرح گوارہ کرتے

چشم مخمور سے بے خود جو نہ ہو جاتے ہم

دل کو آتش کدہ اور چشم کو دریا کرتے

کر کے بسمل جو ہمیں چھوڑ دیا قاتل نے

ہم تڑپتے کہ اسے دیکھتے کیا کیا کرتے

وہ عیادت کو حقیرؔ آپ کی آتے جو کبھی

کرتے احسان اگر آپ کو اچھا کرتے

kya dam-e-nazaa koi aur tamanna karte

jab talak dam na nikalta use dekha karte

dard duri ka bajuz marg nahin koi ilaj

aise bimar ki ham koi dawa kya karte

aise bhule ke kabhi phir ke na puchha tum ne

kuchh to ai rahat-e-jan pas-e-wafa ka karte

jaur sab ham ne sahe jitne kiye gardun ne

duri-e-yar ko kis tarah gawara karte

chashm-e-makhmur se be khud jo na ho jate ham

dil ko atish kada aur chashm ko dariya karte

kar ke bismil jo hamen chhor diya qatil ne

ham tarapte ke use dekhte kya kya karte

wo ayadat ko haqir ap ki ate jo kabhi

karte ehsan agar ap ko achchha karte