کیا ضرورت بے ضرورت دیکھنا

کیا ضرورت بے ضرورت دیکھنا

تم نہ آئینے کی صورت دیکھنا

پھر گئیں بیمار غم کو دیکھ کر

اپنی آنکھوں کی مروت دیکھنا

ہم کہاں اے دل کہاں دیدار یار

ہو گیا تیری بدولت دیکھنا

ہے وہ جب دل میں تو کیسی جستجو

ڈھونڈنے والوں کی غفلت دیکھنا

سامنے تعریف پیچھے گالیاں

ان کی منہ دیکھی محبت دیکھنا

جن کو باقی ہی نہ ہو امید کچھ

ایسے مایوسوں کی حسرت دیکھنا

مرا خط یہ کہہ کے غیروں کو دیا

اک ذرا اس کی عبارت دیکھنا

اور کچھ تم کو نہ آئے گا نظر

دل میں رہ کر دل کی حسرت دیکھنا

صبح اٹھ کر دیکھنا احسنؔ کا منہ

ایسے ویسوں کی نہ صورت دیکھنا

kya zarurat be zarurat dekhna

tum na aine ki surat dekhna

phir gain bimar gham ko dekh kar

apni ankhon ki murawwat dekhna

ham kahan ai dil kahan didar-e-yar

ho gaya teri badaulat dekhna

hai wo jab dil mein to kaisi justuju

dhundne walon ki ghaflat dekhna

samne taarif pichhe galiyan

un ki munh dekhi mohabbat dekhna

jin ko baqi hi na ho ummid kuchh

aise mayuson ki hasrat dekhna

mira khat ye kah ke ghairon ko diya

ik zara us ki ibarat dekhna

aur kuchh tum ko na aega nazar

dil mein rah kar dil ki hasrat dekhna

subh uth kar dekhna ahsan ka munh

aise waison ki na surat dekhna