کیا خبر تھی یار کے آتے ہی آفت آئے گی

کیا خبر تھی یار کے آتے ہی آفت آئے گی

قامت زیبا میں پوشیدہ قیامت آئے گی

پہلوئے ویراں کو اپنے دیکھ کر کہتا ہوں میں

دل نہ ڈھونڈھوں گا یہاں ان کی ندامت آئے گی

غم نہیں مونس نہ ہو کوئی ترے بیمار کا

وادئ غربت میں اس کے ساتھ ہمت آئے گی

اس تصور میں نہ دیکھا آئینہ اس یار نے

بن کے جان مبتلا مرأت میں حیرت آئے گی

مارتے ہیں بے گنہ وہ روز اک ناشاد کو

رفتہ رفتہ ایک دن اپنی بھی نوبت آئے گی

دشمنوں نے یہ سمجھ کر بزم سے روکا مجھے

دیکھ کر شاید مجھے ان کو مروت آئے گی

میری بیتابی کی حالت سے انہیں آگہ کیا

حیف تجھ میں نامہ بر کب آدمیت آئے گی

گو غریب بے وطن ہوں بعد مردن دیکھنا

آہ و زاری کو مری تربت پہ حسرت آئے گی

ہے دم مردن تصور اے بت زیبا ترا

موت آئے گی تو بن کر تیری صورت آئے گی

اے جمیلہؔ اس دل وحشی کی حالت دیکھ کر

قیس کو فرہاد کو وامق کو عبرت آئے گی

kya khabar thi yar ke ate hi afat aegi

qamat-e-zeba mein poshida qayamat aegi

pahlu-e-wiran ko apne dekh kar kahta hun main

dil na dhundhunga yahan un ki nadamat aegi

gham nahin munis na ho koi tire bimar ka

wadi-e-ghurbat mein us ke sath himmat aegi

is tasawwur mein na dekha aina us yar ne

ban ke jan-e-mubtala marat mein hairat aegi

marte hain be gunah wo roz ik nashad ko

rafta rafta ek din apni bhi naubat aegi

dushmanon ne ye samajh kar bazm se roka mujhe

dekh kar shayad mujhe un ko murawwat aegi

meri betabi ki halat se unhen agah kiya

haif tujh mein nama bar kab admiyyat aegi

go gharib be watan hun baad murdan dekhna

ah-o-zari ko miri turbat pe hasrat aegi

hai dam-e-murdan tasawwur ai but-e-zeba tira

maut aegi to ban kar teri surat aegi

ai jamilahu is dil-e-wahshi ki halat dekh kar

qais ko farhad ko wamiq ko ibrat aegi