کیا حنا خوں ریز نکلی ہائے پس جانے کے بعد

کیا حنا خوں ریز نکلی ہائے پس جانے کے بعد

بن گئی تلوار ان کے ہاتھ میں آنے کے بعد

جام جم کی دھوم ہے سارے جہاں میں ساقیا

مانتا ہوں میں بھی لیکن تیرے پیمانے کے بعد

شکریہ واعظ جو مجھ کو ترک مے کی دی صلاح

غور میں اس پر کروں گا ہوش میں آنے کے بعد

شمع معشوقوں کو سکھلاتی ہے طرز عاشقی

جل کے پروانے سے پہلے بجھ کے پروانے کے بعد

آشنا ہو کر بتوں کے ہو گئے حق آشنا

ہم نے کعبے کی بنا ڈالی ہے بت خانے کے بعد

میں کروں کس کا نظارہ دیکھ کر تیرا جمال

میں سنوں کس کا فسانہ تیرے افسانے کے بعد

شمع محفل کا ہوا یہ رنگ ان کے سامنے

پھول کی ہوتی ہے صورت جیسے مرجھانے کے بعد

سچ یہ کہتے ہیں کہ ہنسنے کی جگہ دنیا نہیں

چشم عبرت ہیں چمن کے پھول مرجھانے کے بعد

فکر و کاوش ہو تو نکلیں معنیٔ رنگیں جلیلؔ

لعل اگلتی ہے زباں خون جگر کھانے کے بعد

kya hina khun rez nikli hae pas jane ke baad

ban gai talwar un ke hath mein ane ke baad

jam-e-jam ki dhum hai sare jahan mein saqiya

manta hun main bhi lekin tere paimane ke baad

shukriya waiz jo mujh ko tark-e-mai ki di salah

ghaur mein us par karunga hosh mein ane ke baad

shama maashuqon ko sukhlati hai tarz-e-ashiqi

jal ke parwane se pahle bujh ke parwane ke baad

ashna ho kar buton ke ho gae haq ashna

ham ne kaabe ki bana dali hai but khane ke baad

main karun kis ka nazara dekh kar tera jamal

main sunun kis ka fasana tere afsane ke baad

sham-e-mahfil ka hua ye rang un ke samne

phul ki hoti hai surat jaise murjhane ke baad

sach ye kahte hain ke hansne ki jagah duniya nahin

chashm-e-ibrat hain chaman ke phul murjhane ke baad

fikr-o-kawish ho to niklen maani-e-rangin jalil

laal ugalti hai zaban khun-e-jigar khane ke baad