کی میرے تڑپنے کی نہ تدبیر کسی نے — زین العابدین خاں عارف

کی میرے تڑپنے کی نہ تدبیر کسی نے

اس کی نہ دکھائی مجھے تصویر کسی نے

کھانوں سے منوں غم کے بھی سیری نہیں ہوتی

کیا مجھ کو کھلا دی کہیں اکسیر کسی نے

یہ کوہ کن و قیس یوں ہی مر گئے آخر

دیکھی نہ کبھی آہ کی تاثیر کسی نے

شاد اس نگہ یار کے دھوکے میں ہوا ہوں

مارا ہے میرے سینے میں جب تیر کسی نے

یہ ریختہ وہ ہے کہ کوئی ڈھا نہیں سکتا

عارفؔ کہیں دیکھی ہے یہ تعمیر کسی نے