تری تیغ ابرو کی ٹک سامنے کر دیکھیں تو

تری تیغ ابرو کی ٹک سامنے کر دیکھیں تو

بچے خورشید بھی رکھ منہ پہ سپر دیکھیں تو

میرے خورشید لقا دید کی ٹک رخصت دے

تیرے دیدار کو پھر ایک نظر دیکھیں تو

تیغ تولے ہوے کاندھے پہ جو آیا ہے سوار

او سجیلے مرے گھوڑے سے اتر دیکھیں تو

مر گیا جو اسے کہتے ہیں ہوا آج وصال

جی رچا زیست سے اس ہجر میں مر دیکھیں تو

بہہ چکا خانۂ دل آنکھ تک آ پہنچی سیل

روئے جا اور بھی اے دیدۂ تر دیکھیں تو

آ کے آنکھوں کا شبستاں مرا روشن کر دے

وہ دن آتا ہے کب اے نور بصر دیکھیں تو

ہے مثل غصہ اتر جاتا ہے پاؤں پہ گرے

قدموں پر اس کے بھلا سر کو بھی دھر دیکھیں تو

دن بہت بیت گئے گلیاں ہیں سونی تجھ بن

جانی بن ٹھن ذری آ جاؤ ادھر دیکھیں تو

سب کہیں گزری پہ گزری نہ کوئے دلبر میں

رہے جاں اظفریؔ اس سے بھی گزر دیکھیں تو

tiri tegh-e-abru ki tuk samne kar dekhen to

bachche khurshid bhi rakh munh pe sipar dekhen to

mere khurshid liqa did ki tuk rukhsat de

tere didar ko phir ek nazar dekhen to

tegh tole hue kandhe pe jo aya hai sawar

o sajile mire ghore se utar dekhen to

mar gaya jo use kahte hain hua aj wisal

ji racha zist se is hijr mein mar dekhen to

bah chuka khana-e-dil ankh tak a pahunchi sail

ru-e-ja aur bhi ai dida-e-tar dekhen to

a ke ankhon ka shabistan mira raushan kar de

wo din ata hai kab ai nur-e-basar dekhen to

hai misl-e-ghussa utar jata hai paon pe gire

qadmon par us ke bhala sar ko bhi dhar dekhen to

din bahut bit gae galiyan hain suni tujh bin

jani ban than zari a jao idhar dekhen to

sab kahin guzri pe guzri na ku-e-dilbar mein

rahe jan azfari us se bhi guzar dekhen to