کہیں کیا کہ کیا کیا ستم دیکھتے ہیں

کہیں کیا کہ کیا کیا ستم دیکھتے ہیں

لکھا ہے جو قسمت میں ہم دیکھتے ہیں

کبھی آہ نعرہ کبھی کھینچتے ہیں

ہم اس ساز کا زیر و بم دیکھتے ہیں

خط سر نوشت اپنا ہم پڑھ رہے ہیں

تمہارا جو نقش قدم دیکھتے ہیں

مرے رو بہ رو وہ بہم غیر سے ہیں

نہ دیکھے کوئی جو کہ ہم دیکھتے ہیں

رہی گر تلاش کمر یوں ہی ہم کو

کوئی دم میں ملک عدم دیکھتے ہیں

ہزاروں گماں دل میں ہوتے ہیں پیدا

ترے ہاتھ میں جب قلم دیکھتے ہیں

نہیں جانا کس دن تو غیروں کے گھر پر

صریحاً تو آنکھوں سے ہم دیکھتے ہیں

نہیں آرزو کچھ بھی بوسے کی ہم کو

مگر ہم تمہارا کرم دیکھتے ہیں

جو عالم کہ دیکھا ہے کوئے بتاں میں

خدا کی خدائی میں کم دیکھتے ہیں

نظر آتے ہو سحرؔ عاشق کسی پر

تمہیں ہر گھڑی چشم نم دیکھتے ہیں

kahen kya ke kya kya sitam dekhte hain

likha hai jo qismat mein ham dekhte hain

kabhi ah naara kabhi khinchte hain

ham is saz ka zer-o-bam dekhte hain

khat-e-sar nawisht apna ham parh rahe hain

tumhara jo naqsh-e-qadam dekhte hain

mire ru ba ro wo baham ghair se hain

na dekhe koi jo ke ham dekhte hain

rahi gar talash-e-kamar yun hi ham ko

koi dam mein mulk-e-adam dekhte hain

hazaron guman dil mein hote hain paida

tire hath mein jab qalam dekhte hain

nahin jana kis din to ghairon ke ghar par

sarihan to ankhon se ham dekhte hain

nahin arzu kuchh bhi bose ki ham ko

magar ham tumhara karam dekhte hain

jo alam ke dekha hai ku-e-butan mein

khuda ki khudai mein kam dekhte hain

nazar ate ho sehr ashiq kisi par

tumhen har ghari chashm-e-nam dekhte hain