کیا بنائے صانع قدرت نے پیارے ہاتھ پاؤں

کیا بنائے صانع قدرت نے پیارے ہاتھ پاؤں

نور کے سانچے میں ڈھالے ہیں تمہارے ہاتھ پاؤں

ضعف پیری چھا گیا زور جوانی چل بسا

اب چلیں بتلائیے کس کے سہارے ہاتھ پاؤں

مچھلیاں بازو پہ ابھریں ساق پا شمعیں بنیں

خوب صاحب نے نکالے اب تو بارے ہاتھ پاؤں

فوق ہیرے سے نہیں ہے میری جاں یاقوت کو

کیوں رنگے ہیں آپ نے مہندی سے سارے ہاتھ پاؤں

مانی و بہزاد نے ملک عدم کی راہ لی

وہ کمر مطلق نہ پائی لاکھ مارے ہاتھ پاؤں

ہم نہ کہتے تھے کہ ہر دم شوخیاں اچھی نہیں

آخرش مہندی نے باندھے لو تمہارے ہاتھ پاؤں

ہاتھا پائی میں بھی ہم چوکے نہ اپنے کام سے

وصل کی شب یار نے کیا کیا نہ مارے ہاتھ پاؤں

ہے ضعیفی میں بھی ہم کو نوجوانی کا خیال

دل نہیں ہارا ہے اب تک گو کہ ہارے ہاتھ پاؤں

غیر کی دھمکی سے ہم ڈر جائیں یہ ممکن نہیں

ایسے بودے بھی نہیں ہیں کچھ ہمارے ہاتھ پاؤں

معدن یاقوت کو دریا بنایا آپ نے

مہندی مل کر دھوئے جب دریا کنارے ہاتھ پاؤں

اس بڑھاپے میں بھی آغاؔ سو جواں میں ایک ہے

گو ضعیفی آ گئی پر ہیں کرارے ہاتھ پاؤں

kya banae sane-e-qudrat ne pyare hath paon

nur ke sanche mein dhale hain tumhare hath paon

zof-e-piri chha gaya zor jawani chal basa

ab chalen batlaiye kis ke sahare hath paon

machhliyan bazu pe ubhren saq pa shamen banen

khub sahab ne nikale ab to bare hath paon

fauq hire se nahin hai meri jan yaqut ko

kyun range hain ap ne mehndi se sare hath paon

mani-o-behzad ne mulk-e-adam ki rah li

wo kamar mutlaq na pai lakh mare hath paon

ham na kahte the ke har dam shokhiyan achchhi nahin

akhirash mehndi ne bandhe lo tumhare hath paon

hatha pai mein bhi ham chuke na apne kam se

wasl ki shab yar ne kya kya na mare hath paon

hai zaifi mein bhi ham ko naujawani ka khayal

dil nahin hara hai ab tak go ke hare hath paon

ghair ki dhamki se ham dar jaen ye mumkin nahin

aise bode bhi nahin hain kuchh hamare hath paon

maadin yaqut ko dariya banaya ap ne

mehndi mil kar dhoe jab dariya kinare hath paon

is burhape mein bhi agha so jawan mein ek hai

go zaifi a gai par hain karare hath paon