کہیں پہنچو بھی مجھ بے پا و سر تک

کہیں پہنچو بھی مجھ بے پا و سر تک

کہ پہنچا شمع ساں داغ اب جگر تک

کچھ اپنی آنکھ میں یاں کا نہ آیا

خذف سے لے کے دیکھا در تر تک

جسے شب آگ سا دیکھا سلگتے

اسے پھر خاک ہی پایا سحر تک

ترا منہ چاند سا دیکھا ہے شاید

کہ انجم رہتے ہیں ہر شب ادھر تک

جب آیا آہ تب اپنے ہی سر پر

گیا یہ ہاتھ کب اس کی کمر تک

ہم آوازوں کو سیر اب کی مبارک

پر و بال اپنے بھی ایسے تھے پر تک

کھنچی کیا کیا خرابی زیر دیوار

ولے آیا نہ وہ ٹک گھر سے در تک

گلی تک تیری لایا تھا ہمیں شوق

کہاں طاقت کہ اب پھر جائیں گھر تک

یہی درد جدائی ہے جو اس شب

تو آتا ہے جگر مژگان تر تک

دکھائی دیں گے ہم میت کے رنگوں

اگر رہ جائیں گے جیتے سحر تک

کہاں پھر شور شیون جب گیا میرؔ

یہ ہنگامہ ہے اس ہی نوحہ گر تک

kahin pahuncho bhi mujh be pa-o-sar tak

ke pahuncha shama san dagh ab jigar tak

kuchh apni ankh mein yan ka na aya

khazaf se le ke dekha dar-e-tar tak

jise shab ag sa dekha sulagte

use phir khak hi paya sahar tak

tira munh chand sa dekha hai shayad

ke anjum rahte hain har shab idhar tak

jab aya ah tab apne hi sar par

gaya ye hath kab us ki kamar tak

ham awazon ko sair ab ki mubarak

par-o-bal apne bhi aise the par tak

khinchi kya kya kharabi zer-e-diwar

wale aya na wo tuk ghar se dar tak

gali tak teri laya tha hamen shauq

kahan taqat ke ab phir jaen ghar tak

yahi dard-e-judai hai jo is shab

tu ata hai jigar mizhgan-e-tar tak

dikhai denge ham mayyat ke rangun

agar rah jaenge jite sahar tak

kahan phir shor-e-shewan jab gaya mir

ye hangama hai is hi nauha gar tak