کی وفا یار سے ایک ایک جفا کے بدلے

کی وفا یار سے ایک ایک جفا کے بدلے

ہم نے گن گن کے لیے خون وفا کے بدلے

کی سپرد در بت خانہ اجل نے مری خاک

کس کو سونپا مجھے ظالم نے خدا کے بدلے

لطف بیداد حیا غصہ تغافل شوخی

رنگ کیا کیا نہ تلون نے ادا کے بدلے

ہائے میں کشتۂ انداز ہوں یا رب کس کا

حور آئی مجھے لینے کو قضا کے بدلے

تیر سے تیغ سے خنجر سے سناں سے مارا

کئی پہلو مرے قاتل نے قضا کے بدلے

کفن اے گرد لحد دیکھ نہ میلا ہو جائے

آج ہی ہم نے یہ کپڑے ہیں نہا کے بدلے

عشق اللہ بچائے وہ مرض ہے فانیؔ

زہر بیمار کو دیتے ہیں دوا کے بدلے

ki wafa yar se ek ek jafa ke badle

ham ne gin gin ke liye khun-e-wafa ke badle

ki supurd-e-dar-e-but khana ajal ne miri khak

kis ko saunpa mujhe zalim ne khuda ke badle

lutf-e-bedad-e-haya ghussa taghaful shokhi

rang kya kya na talawwun ne ada ke badle

hae mein kushta-e-andaz hun ya rab kis ka

hur ai mujhe lene ko qaza ke badle

tir se tegh se khanjar se sinan se mara

kai pahlu mire qatil ne qaza ke badle

kafan ai gard-e-lahad dekh na maila ho jae

aj hi ham ne ye kapre hain naha ke badle

ishq allah bachae wo maraz hai fani

zahr-e-bimar ko dete hain dawa ke badle