کہو دیر و حرم یا نام اپنا آستاں رکھ دو

کہو دیر و حرم یا نام اپنا آستاں رکھ دو

سر تسلیم خم ہے تم جہاں چاہو وہاں رکھ دو

گھٹا کر قید آزادی بڑھا دو غم اسیری کا

قفس کو آشیاں میں یا قفس میں آشیاں رکھ دو

تسلی دینے والو ہم تہی دستان قسمت ہیں

سر دامن جو ممکن ہو تو دل کی دھجیاں رکھ دو

ضرورت جان کی دل کو میں بے پروائے ہستی ہوں

جہاں دل ہے وہیں اب میری جان ناتواں رکھ دو

خدا کہلاؤ یا کچھ اور سب کچھ مجھ کو کہنا ہے

ادھر آؤ مرے منہ میں تمہیں اپنی زباں رکھ دو

وفا کا راز اس مجمع میں کھولا جا نہیں سکتا

سوا محشر کے کوئی اور روز امتحاں رکھ دو

محبت اور تسلی اس پہ ہوش زندگی کیفیؔ

نہیں اٹھتا اگر کاندھے سے یہ بار گراں رکھ دو

kaho dair-o-haram ya nam apna astan rakh do

sar-e-taslim kham hai tum jahan chaho wahan rakh do

ghata kar qaid-e-azadi barha do gham asiri ka

qafas ko ashiyan mein ya qafas mein ashiyan rakh do

tasalli dene walo ham tahi dastan qismat hain

sar-e-daman jo mumkin ho to dil ki dhajjiyan rakh do

zarurat jan ki dil ko main be parwae hasti hun

jahan dil hai wahin ab meri jan-e-natawan rakh do

khuda kahlao ya kuchh aur sab kuchh mujh ko kahna hai

idhar ao mire munh mein tumhen apni zaban rakh do

wafa ka raz is majmaa mein khola ja nahin sakta

siwa mahshar ke koi aur roz-e-imtihan rakh do

mohabbat aur tasalli us pe hosh-e-zindagi kaifi

nahin uthta agar kandhe se ye bar-e-giran rakh do