کہوں کیا دل اڑانے کا ترا کچھ ڈھب نرالا تھا

کہوں کیا دل اڑانے کا ترا کچھ ڈھب نرالا تھا

وگرنہ ہر طرح سے اب تلک تو میں سنبھالا تھا

کہاں اب کھل کے وہ رونا کدھر وہ اشک کی شورش

کبھو کچھ پھوٹ بہتا ہے جگر پر وہ جو چھالا تھا

ہوا آوارۂ دشت و بیاباں دیکھتے اپنے

وہ طفل اشک جو الفت سے آنکھوں بیچ پالا تھا

ترا غم کھا گیا میرا کلیجہ دل سبھی یک بار

ہوا ہوگا کہاں سے سیر یہ تو اک نوالہ تھا

ابھی تو لگ نہ چلنا تھا اثرؔ اس گل بدن کے ساتھ

کوئی دن دیکھنا تھا زخم دل بے طرح آلا تھا

kahun kya dil urane ka tira kuchh dhab nirala tha

wagarna har tarah se ab talak to main sambhala tha

kahan ab khul ke wo rona kidhar wo ashk ki shorish

kabhu kuchh phut bahta hai jigar par wo jo chhala tha

hawa awara-e-dasht-o-bayaban dekhte apne

wo tifl-e-ashk jo ulfat se ankhon bich pala tha

tira gham kha gaya mera kaleja dil sabhi yak bar

hawa hoga kahan se sair ye to ik nawala tha

abhi to lag na chalna tha asar us gul badan ke sath

koi din dekhna tha zakhm-e-dil be tarah ala tha