کہتے ہیں بہار آئی گل پھول نکلتے ہیں

کہتے ہیں بہار آئی گل پھول نکلتے ہیں

ہم کنج قفس میں ہیں دل سینوں میں جلتے ہیں

اب ایک سی بے ہوشی رہتی نہیں ہے ہم کو

کچھ دل بھی سنبھلتے ہیں پر دیر سنبھلتے ہیں

وہ تو نہیں اک چھینٹا رونے کا ہوا گاہے

اب دیدۂ تر اکثر دریا سے ابلتے ہیں

ان پاؤں کو آنکھوں سے ہم ملتے رہے جیسا

افسوس سے ہاتھوں کو اب ویسا ہی ملتے ہیں

کیا کہیے کہ اعضا سب پانی ہوئے ہیں اپنے

ہم آتش ہجراں میں یوں ہی پڑے گلتے ہیں

کرتے ہیں صفت جب ہم لعل لب جاناں کی

تب کوئی ہمیں دیکھے کیا لعل اگلتے ہیں

گل پھول سے بھی اپنے دل تو نہیں لگتے ٹک

جی لوگوں کے بے جاناں کس طور بہلتے ہیں

ہیں نرم صنم گو نہ کہنے کے تئیں ورنہ

پتھر ہیں انھوں کے دل کاہے کو پگھلتے ہیں

اے گرم سفر یاراں جو ہے سو سر رہ ہے

جو رہ سکو رہ جاؤ اب میرؔ بھی چلتے ہیں

kahte hain bahar ai gul phul nikalte hain

ham kunj-e-qafas mein hain dil sinon mein jalte hain

ab ek si be hoshi rahti nahin hai ham ko

kuchh dil bhi sambhalte hain par der sambhalte hain

wo to nahin ik chhinta rone ka hua gahe

ab dida-e-tar aksar dariya se ubalte hain

un paon ko ankhon se ham milte rahe jaisa

afsos se hathon ko ab waisa hi milte hain

kya kahiye ke aaza sab pani hue hain apne

ham atish hijran mein yun hi pare galte hain

karte hain sifat jab ham laal-e-lab janan ki

tab koi hamen dekhe kya laal ugalte hain

gul phul se bhi apne dil to nahin lagte tuk

ji logon ke be janan kis taur bahalte hain

hain narm sanam go na kahne ke tain warna

patthar hain inhon ke dil kahe ko pighalte hain

ai garm-e-safar yaran jo hai so sar rah hai

jo rah sako rah jao ab mir bhi chalte hain