کہتے ہیں عید ہے آج اپنی بھی عید ہوتی

کہتے ہیں عید ہے آج اپنی بھی عید ہوتی

ہم کو اگر میسر جاناں کی دید ہوتی

قیمت میں دید رخ کی ہم نقد جاں لگاتے

بازار ناز لگتا دل کی خرید ہوتی

کچھ اپنی بات کہتے کچھ میرا حال سنتے

ناز و نیاز کی یوں گفت و شنید ہوتی

جلوے دکھاتے جاتے وہ طرز دلبری کے

اور دل میں یاں ہوائے ناز مزید ہوتی

تیغ نظر سے دل پر وہ وار کرتے جاتے

اور لب پہ یاں صدائے ھل من مزید ہوتی

ابرو سے ان کے غمزہ تیر ادا لگاتا

یہ دل قتیل ہوتا یہ جاں شہید ہوتی

کچھ حوصلہ بڑھاتا انداز لطف جاناں

کچھ دغدغہ سا ہوتا کچھ کچھ امید ہوتی

kahte hain eid hai aj apni bhi eid hoti

ham ko agar muyassar janan ki did hoti

qimat mein did rukh ki ham naqd-e-jan lagate

bazar-e-naz lagta dil ki kharid hoti

kuchh apni bat kahte kuchh mera hal sunte

naz-o-niyaz ki yun guft-o-shanid hoti

jalwe dikhate jate wo tarz-e-dilbari ke

aur dil mein yan hawa-e-naz-e-mazid hoti

tegh-e-nazar se dil par wo war karte jate

aur lab pe yan sada-e-hal man mazid hoti

abru se un ke ghamza tir-e-ada lagata

ye dil qatil hota ye jan shahid hoti

kuchh hausla barhata andaz-e-lutf-e-janan

kuchh daghdagha sa hota kuchh kuchh ummid hoti