کہتے ہیں کہ دے میری بلا داد کسی کی

کہتے ہیں کہ دے میری بلا داد کسی کی

کانوں کو مزہ دیتی ہے فریاد کسی کی

رونا ہے ترا کام مگر دیدۂ تر دیکھ

تصویر خیالی نہ ہو برباد کسی کی

کرتا ہوں گلہ ان سے جو ویرانئ دل کا

کہتے ہیں یہ بستی نہیں آباد کسی کی

آباد خدا رکھے تجھے کوئے محبت

مٹی نہیں ہوتی یہاں برباد کسی کی

کچھ اور تو ہم پاس مبارکؔ نہیں رکھتے

رکھتا ہے تمنا دل ناشاد کسی کی

kahte hain ke de meri bala dad kisi ki

kanon ko maza deti hai fariyad kisi ki

rona hai tira kam magar dida-e-tar dekh

taswir-e-khayali na ho barbad kisi ki

karta hun gila un se jo wirani-e-dil ka

kahte hain ye basti nahin abad kisi ki

abad khuda rakhe tujhe ku-e-mohabbat

mitti nahin hoti yahan barbad kisi ki

kuchh aur to ham pas mubarak nahin rakhte

rakhta hai tamanna dil-e-nashad kisi ki