کہوں کیا اضطراب دل زباں سے

کہوں کیا اضطراب دل زباں سے

رہے جاتے ہیں سب پہلو بیاں سے

انہیں چہکا رہا ہوں چاند کہہ کر

عوض لینا ہے مجھ کو آسماں سے

ہم ایسے ناتواں وہ ایسے نازک

اٹھائے کون پردہ درمیاں سے

شمیم گل نے بڑھ کر حال مارا

قدم باہر جو رکھا آشیاں سے

تڑپ میری ترقی کر رہی ہے

زمیں ٹکرا نہ جائے آسماں سے

خدا رکھے چمن کا پھول ہو تم

ہنسو کھیلو نسیم بوستاں سے

نگاہ گل سے بلبل یوں گری ہے

گرے جس طرح تنکا آشیاں سے

زمین شعر ہم کرتے ہیں آباد

چلے آتے ہیں مضموں آسماں سے

بڑا لنگر تھا شعر و شاعری کا

اٹھا کیوں کر جلیلؔ ناتواں سے

kahun kya iztirab-e-dil zaban se

rahe jate hain sab pahlu bayan se

unhen chahka raha hun chand kah kar

ewaz lena hai mujh ko asman se

ham aise natawan wo aise nazuk

uthae kaun parda darmiyan se

shamim-e-gul ne barh kar hal mara

qadam bahar jo rakha ashiyan se

tarap meri taraqqi kar rahi hai

zamin takra na jae asman se

khuda rakhe chaman ka phul ho tum

hanso khelo nasim-e-bostan se

nigah-e-gul se bulbul yun giri hai

gire jis tarah tinka ashiyan se

zamin-e-sher ham karte hain abad

chale ate hain mazmun asman se

bara langar tha sher-o-shayari ka

utha kyun kar jalil-e-natawan se