کہتے ہو اتحاد ہے ہم کو

کہتے ہو اتحاد ہے ہم کو

ہاں کہو اعتماد ہے ہم کو

شوق ہی شوق ہے نہیں معلوم

اس سے کیا دل نہاد ہے ہم کو

خط سے نکلے ہے بے وفائی حسن

اس قدر تو سواد ہے ہم کو

آہ کس ڈھب سے روئیے کم کم

شوق حد سے زیاد ہے ہم کو

شیخ و پیر مغاں کی خدمت میں

دل سے اک اعتقاد ہے ہم کو

سادگی دیکھ عشق میں اس کے

خواہش جان شاد ہے ہم کو

بد گمانی ہے جس سے تس سے آہ

قصد شور و فساد ہے ہم کو

دوستی ایک سے بھی تجھ کو نہیں

اور سب سے عناد ہے ہم کو

نامرادانہ زیست کرتا تھا

میرؔ کا طور یاد ہے ہم کو

kahte ho ittihad hai ham ko

han kaho etimad hai ham ko

shauq hi shauq hai nahin maalum

us se kya dil nihad hai ham ko

khat se nikle hai be wafai husn

is qadar to sawad hai ham ko

ah kis dhab se roiye kam kam

shauq had se ziyad hai ham ko

shaikh-o-pir-e-mughan ki khidmat mein

dil se ik etiqad hai ham ko

sadgi dekh ishq mein us ke

khwahish-e-jan shad hai ham ko

bad gumani hai jis se tis se ah

qasd shor-o-fasad hai ham ko

dosti ek se bhi tujh ko nahin

aur sab se inad hai ham ko

namuradana zist karta tha

mir ka tur yad hai ham ko