کھٹک نے دل کی دیا زخم بے نشاں کا پتا

کھٹک نے دل کی دیا زخم بے نشاں کا پتا

نہ اس دہن میں فغاں تھی نہ تھا زباں کا پتا

سر نیاز جھکانے کی خو تو پیدا کر

جبین شوق لگا لے گی آستاں کا پتا

ستم دبا نہ سکا آپ کے شہیدوں کو

جفا مٹا نہ سکی خون بے کساں کا پتا

رگ بریدہ پکارے گی نام قاتل کا

کفن بتائے گا اس تیغ خوں چکاں کا پتا

اسی قدر تو ہے سرمایۂ تجسس عقل

کہ کچھ زمیں کی خبر ہے کچھ آسماں کا پتا

دل تپاں تھا کہیں چشم خونفشاں تھی کہیں

قدم قدم پہ ملا کوچۂ بتاں کا پتا

اسیر دام محبت سے پوچھئے بیتابؔ

کمند طرۂ مشکین دلستاں کا پتا

khatak ne dil ki diya zakhm-e-be nishan ka pata

na is dahan mein fughan thi na tha zaban ka pata

sar-e-niyaz jhukane ki khu to paida kar

jabin-e-shauq laga legi astan ka pata

sitam daba na saka ap ke shahidon ko

jafa mita na saki khun-e-be kisan ka pata

rag-e-burida pukaregi nam qatil ka

kafan bataega is tegh-e-khun chakan ka pata

isi qadar to hai sarmaya-e-tajassus aql

ke kuchh zamin ki khabar hai kuchh asman ka pata

dil-e-tapan tha kahin chashm-e-khunfishan thi kahin

qadam qadam pe mila kucha-e-butan ka pata

asir-e-dam-e-mohabbat se puchhiye betab

kamand turra-e-mushkyun dilsitan ka pata