کہاں ممکن ہے پوشیدہ غم دل کا اثر ہونا

کہاں ممکن ہے پوشیدہ غم دل کا اثر ہونا

لبوں کا خشک ہو جانا بھی ہے آنکھوں کا تر ہونا

غضب مل کر جدا مجھ سے ترا او فتنہ گر ہونا

ستم نالوں کا پر تاثیر ہو کر بے اثر ہونا

جگر میں درد لب پر نالۂ وحشت اثر ہونا

عیاں کرتا ہے اک رشک پری کا دل میں گھر ہونا

غضب نالہ کشی اک صاحب عصمت کے کوچہ میں

ستم اے دل کسی پردہ نشیں کا پردہ در ہونا

وہ ان کا چپکے چپکے مسکرانا خون رونے پر

وہ میرا دل ہی دل میں واصف رنگ اثر ہونا

جو تنہا پاس منزل دل کو شایاں ہے محبت میں

تو آنکھوں کو ہے لازم دیدۂ حسرت نگر ہونا

قیامت تھا ستم تھا قہر تھا خلوت میں او ظالم

وہ شرما کر ترا میری بغل میں جلوہ گر ہونا

ستم کی جور کی بیداد کی کافی شہادت ہے

جدائی میں مرا بیتاب بے خود بے خبر ہونا

kahan mumkin hai poshida gham-e-dil ka asar hona

labon ka khushk ho jana bhi hai ankhon ka tar hona

ghazab mil kar juda mujh se tira o fitna gar hona

sitam nalon ka par tasir ho kar be asar hona

jigar mein dard lab par nala-e-wahshat asar hona

ayan karta hai ik rashk-e-pari ka dil mein ghar hona

ghazab nala kashi ik sahab-e-ismat ke kucha mein

sitam ai dil kisi parda nashin ka parda dar hona

wo un ka chupke chupke muskurana khun rone par

wo mera dil hi dil mein wasaf-e-rang-e-asar hona

jo tanha pas manzil dil ko shayan hai mohabbat mein

tu ankhon ko hai lazim dida-e-hasrat nagar hona

qayamat tha sitam tha qahr tha khalwat mein o zalim

wo sharma kar tira meri baghal mein jalwa gar hona

sitam ki jaur ki bedad ki kafi shahadat hai

judai mein mira betab be khud be khabar hona