کھینچ کر یوں لے چلی وحشت بیاباں کی طرف

کھینچ کر یوں لے چلی وحشت بیاباں کی طرف

لائیں جیسے طفل بد خو کو دبستاں کی طرف

فیض وحشت کا ادائے شکر جب واجب ہوا

سر جھکایا ہم نے محراب گریباں کی طرف

حاصل جوش جنوں ہے ماتم ہوش و خرد

خاک اڑاتے جاتے ہیں وحشی بیاباں کی طرف

عقل کے تیغ جنون تیز سے کوچے کٹے

کون آئے جادۂ چاک گریباں کی طرف

کر چکا جوش جنوں جنس خرد پر ہاتھ صاف

لوٹ اب آتی ہے بازار گریباں کی طرف

عشق کے مکتب میں جب آیا پئے درس جنوں

پہلے ہی انگلی اٹھی نون گریباں کی طرف

مائل زیور ہوا جب وہ حسین جامہ زیب

چاند آیا چرخ سے طوق گریباں کی طرف

ہوش میں آتے ہیں دیوانے گئی فصل بہار

دشت وحشت چھپ رہے پشت گریباں کی طرف

ناخن غم کا نشاں دل پر ہے مثل ماہ نو

انگلیاں اٹھتی ہیں اس زخم نمایاں کی طرف

جب کسی عاشق نے کچھ حال پریشانی کہا

ہنس دئے منہ پھیر کر زلف پریشاں کی طرف

ضعف میں جی کھول کر رونے کی حسرت ہے مجھے

دیکھتا ہے یاس سے ہر اشک داماں کی طرف

شمع کے شعلے ستم کرتے ہیں مثل برق طور

دیکھتا ہوں جب نظرؔ بزم حسیناں کی طرف

khinch kar yun le chali wahshat bayaban ki taraf

laen jaise tifl-e-bad khu ko dabistan ki taraf

faiz wahshat ka ada-e-shukr jab wajib hua

sar jhukaya ham ne mehrab-e-gareban ki taraf

hasil josh-e-junun hai matam hosh-o-khirad

khak urate jate hain wahshi bayaban ki taraf

aql ke tegh-e-junun-e-tez se kuche kate

kaun ae jada-e-chak-e-gareban ki taraf

kar chuka josh-e-junun jins-e-khirad par hath saf

laut ab ati hai bazar-e-gareban ki taraf

ishq ke maktab mein jab aya piye dars-e-junun

pahle hi ungli uthi nawan gareban ki taraf

mail zewar hua jab wo hasin jama zeb

chand aya charkh se tauq-e-gareban ki taraf

hosh mein ate hain diwane gai fasl-e-bahar

dasht-e-wahshat chhup rahe pusht-e-gareban ki taraf

nakhun-e-gham ka nishan dil par hai misl-e-mah-e-nau

ungliyan uthti hain is zakhm-e-numayan ki taraf

jab kisi ashiq ne kuchh hal-e-pareshani kaha

hans diye munh pher kar zulf-e-pareshan ki taraf

zof mein ji khol kar rone ki hasrat hai mujhe

dekhta hai yas se har ashk daman ki taraf

shama ke shole sitam karte hain misl-e-barq-e-tur

dekhta hun jab nazar bazm-e-hasinan ki taraf