کھوویں ہیں نیند میری مصیبت بیانیاں

کھوویں ہیں نیند میری مصیبت بیانیاں

تم بھی تو ایک رات سنو یہ کہانیاں

کیا آگ دے کے طور کو کی ترک سرکشی

اس شعلے کی وہی ہیں شرارت کی بانیاں

صحبت رکھا کیا وہ سفیہ و ضلال سے

دل ہی میں خوں ہوا کیں مری نکتہ دانیاں

ہم سے تو کینے ہی کی ادائیں چلی گئیں

بے لطفیاں یہی یہی نا مہربانیاں

تلوار کے تلے ہی گیا عہد انبساط

مر مر کے ہم نے کاٹی ہیں اپنی جوانیاں

گالی سوائے مجھ سے سخن مت کیا کرو

اچھی لگے ہیں مجھ کو تری بد زبانیاں

غیروں ہی کے سخن کی طرف گوش یار تھے

اس حرف ناشنو نے ہماری نہ مانیاں

یہ بے قراریاں نہ کبھو ان نے دیکھیاں

جاں کاہیاں ہماری بہت سہل جانیاں

مارا مجھے بھی سان کے غیروں میں ان نے میرؔ

کیا خاک میں ملائیں مری جاں فشانیاں

khowen hain nind meri musibat bayaniyan

tum bhi to ek rat suno ye kahaniyan

kya ag de ke tur ko ki tark-e-sarkashi

is shole ki wahi hain shararat ki baniyan

sohbat rakha kya wo safya-o-zalal se

dil hi mein khun hua kin miri nukta daniyan

ham se to kine hi ki adaen chali gain

be lutfiyan yahi yahi na mehrbaniyan

talwar ke tale hi gaya ahd-e-imbisat

mar mar ke ham ne kati hain apni jawaniyan

gali siwae mujh se sukhan mat kiya karo

achchhi lage hain mujh ko tiri bad zabaniyan

ghairon hi ke sukhan ki taraf gosh-e-yar the

is harf nashunau ne hamari na maniyan

ye be qarariyan na kabhu un ne dekhiyan

jan kahiyan hamari bahut sahl janiyan

mara mujhe bhi san ke ghairon mein un ne mir

kya khak mein milaen miri jan fishaniyan