کہاں تک جفا حسن والوں کی سہتے

کہاں تک جفا حسن والوں کی سہتے

جوانی جو رہتی تو پھر ہم نہ رہتے

لہو تھا تمنا کا آنسو نہیں تھے

بہائے نہ جاتے تو ہرگز نہ بہتے

وفا بھی نہ ہوتا تو اچھا تھا وعدہ

گھڑی دو گھڑی تو کبھی شاد رہتے

ہجوم تمنا سے گھٹتے تھے دل میں

جو میں روکتا بھی تو نالے نہ رہتے

میں جاگوں گا کب تک وہ سوئیں گے تا کے

کبھی چیخ اٹھوں گا غم سہتے سہتے

بتاتے ہیں آنسو کہ اب دل نہیں ہے

جو پانی نہ ہوتا تو دریا نہ بہتے

زمانہ بڑے شوق سے سن رہا تھا

ہمیں سو گئے داستاں کہتے کہتے

کوئی نقش اور کوئی دیوار سمجھا

زمانہ ہوا مجھ کو چپ رہتے رہتے

مری ناؤ اس غم کے دریا میں ثاقبؔ

کنارے پہ آ ہی لگی بہتے بہتے

kahan tak jafa husn walon ki sahte

jawani jo rahti to phir ham na rahte

lahu tha tamanna ka ansu nahin the

bahae na jate to hargiz na bahte

wafa bhi na hota to achchha tha waada

ghari do ghari to kabhi shad rahte

hujum-e-tamanna se ghatte the dil mein

jo main rokta bhi to nale na rahte

main jagunga kab tak wo soenge ta ke

kabhi chikh uthunga gham-e-sahte sahte

batate hain ansu ke ab dil nahin hai

jo pani na hota to dariya na bahte

zamana bare shauq se sun raha tha

hamen so gae dastan kahte kahte

koi naqsh aur koi diwar samjha

zamana hua mujh ko chup rahte rahte

miri nao is gham ke dariya mein saqib

kinare pe a hi lagi bahte bahte