ترک جس دن سے کیا ہم نے شکیبائی کا

ترک جس دن سے کیا ہم نے شکیبائی کا

جا بجا شہر میں چرچا ہوا رسوائی کا

غیر داغ دل صد چاک نہ مونس نہ رفیق

زور عالم پہ ہے عالم مری تنہائی کا

پہروں ہی اپنے تئیں آپ ہوں بھولا رہتا

دھیان آتا ہے جب اپنے مجھے ہرجائی کا

زلزلہ گور میں مجنوں کی پڑا رہتا ہے

اپنا یہ شور ہے اب بادیہ پیمائی کا

جلوہ اس کا ہے ہر اک گھر میں بسان خورشید

فرق ہے اپنی فقط آہ یہ بینائی کا

کلمۂ حق بھی دم نزع نہ نکلا منہ سے

شیخ کو دھیان تھا ایسا بت ترسائی کا

کشش نالہ اسے کہتے ہیں اب وہ جو سرورؔ

محو نظارہ ہوا اپنے تماشائی کا

tark jis din se kiya ham ne shakebai ka

ja baja shahr mein charcha hua ruswai ka

ghair dagh-e-dil-e-sad chak na munis na rafiq

zor-e-alam pe hai alam miri tanhai ka

pahron hi apne tain ap hun bhula rahta

dhyan ata hai jab apne mujhe harjai ka

zalzala gor mein majnun ki para rahta hai

apna ye shor hai ab badiya paimai ka

jalwa us ka hai har ik ghar mein basan-e-khurshid

farq hai apni faqat ah ye binai ka

kalima-e-haq bhi dam-e-nazaa na nikla munh se

shaikh ko dhyan tha aisa but-e-tarsai ka

kashish-e-nala use kahte hain ab wo jo surur

mahw-e-nazzara hua apne tamashai ka