کچھ خاک رہ گزار تھے کچھ داغدار تھے

کچھ خاک رہ گزار تھے کچھ داغدار تھے

میرے چمن کے پھول شہید بہار تھے

منزل کڑی تھی پیش نظر اور ہم سفر

خوش تھے کہ زیر سایۂ دیوار یار تھے

ایما ہی تھا یہ چشم دل آویز یار کا

ہم رمز خوان گردش لیل و نہار تھے

ڈرتے نہ تھے درازیٔ شام فراق سے

ہم راز دار سلسلۂ زلف یار تھے

ہم جانتے تھے خون شہیداں کا ماجرا

ہم نکتہ دان غازۂ روئے نگار تھے

پھولوں سے ہم کلام تھے کانٹوں کے ہمزباں

دیکھو ہمیں کہ محرم فصل بہار تھے

یہ طرفہ ماجرا ہے کہ اڑتی تھی دل میں خاک

پھر بھی یہاں نشان کف پائے یار تھے

کرتا ہے اختیار غم یار بھی یہ روپ

ہم شاد تھے کہ رہن غم روزگار تھے

امسال موج گل ہی نہ تھی زینت چمن

سیلاب خوں بھی غازۂ روئے بہار تھے

آیا کوئی چمن میں سنہری قفس لئے

کچھ نغمہ گر طیور سر شاخسار تھے

ہم وحشیوں نے صحن گلستاں سے اے خزاں

تنکے بھی چن لئے کہ شریک بہار تھے

عابدؔ ذلیل و خوار تھی رسم نوا گری

نغمے ہمیں بھی نوک زباں بے شمار تھے

kuchh khak-e-rah guzar the kuchh daghdar the

mere chaman ke phul shahid-e-bahar the

manzil kari thi pesh-e-nazar aur ham safar

khush the ke zer-e-saya-e-diwar-e-yar the

ima hi tha ye chashm-e-dil awez yar ka

ham ramz khwan gardish-e-lail-o-nahar the

darte na the darazi-e-sham-e-firaq se

ham raz dar silsila-e-zulf-e-yar the

ham jante the khun-e-shahidan ka majra

ham nukta dan-e-ghaza-e-ru-e-nigar the

phulon se ham kalam the kanton ke hamzaban

dekho hamen ke mahram-e-fasl-e-bahar the

ye turfa majra hai ke urti thi dil mein khak

phir bhi yahan nishan-e-kaf-e-pae yar the

karta hai ikhtiyar gham-e-yar bhi ye rup

ham shad the ke rehn gham-e-rozgar the

imsal mauj-e-gul hi na thi zinat-e-chaman

sailab khun bhi ghaza-e-ru-e-bahar the

aya koi chaman mein sunahri qafas liye

kuchh naghma gar tuyur sar-e-shakhsar the

ham wahshiyon ne sehn-e-gulistan se ai khizan

tinke bhi chun liye ke sharik-e-bahar the

abid zalil-o-khwar thi rasm-e-nawa giri

naghme hamen bhi nok-e-zaban be shumar the