کھلا ہے جلوۂ پنہاں سے از بس چاک وحشت کا

کھلا ہے جلوۂ پنہاں سے از بس چاک وحشت کا

میں ڈرتا ہوں کہیں پردہ نہ پھٹ جائے حقیقت کا

کہاں لے جائے گا یا رب سمند تند وحشت کا

کہ پیچھے رہ گیا کوسوں دوراہا نار و جنت کا

غبار رنگ پراں ہے پھریرا تیری رایت کا

شکست قلب عاشق غلغلہ ہے تیری نصرت کا

کیا ہے قصد کس کے کنگر ایوان رفعت کا

کہ تھاما ہے ترے نالے نے پایہ عرش ہمت کا

جھکا دی قدسیوں نے بے تکلف گردن طاعت

زہے رتبہ کف خاک در والائے دولت کا

کھلے کس طرح پردہ پردۂ گوش تحیر پر

کہ بے صوت و صدا ہے پردہ ساز بزم وحدت کا

صنم طاق حرم سے دفعتاً نیچے اتر آئے

ادب تھا بس کہ واجب دوست کے قاصد کے طلعت کا

حجاب تن کساد رونق کالائے یوسف ہے

تردد کیا ہے زنداں خانۂ ہجراں سے ہجرت کا

سلاطیں کو نہیں پاتا مزاج ان کے فقیروں کا

کہ عنقائے فلک پرواز ہے قاف قناعت کا

لب اصنام ہیں قند سخن سے سر بہ مہر اب تک

خموشی سے مزہ پوچھے کوئی تیری فصاحت کا

مزے ملتے ہیں کیا کیا عشق کے لذت شناسوں کو

ہمیں دامان زخم دل عوض ہے خوان نعمت کا

ترے حیرت کدے میں فرش ہے آئینہ کیا او بت

کہ خاصان در دولت کو ہی کھٹکا ہے ذلت کا

نگہ بے حس خط ساغر کی صورت ہے کہ ساقی نے

دیا ہے مردم چشم جہاں کو جام حیرت کا

تلاش جلوۂ معنی میں ٹکرایا کئے سجدے

نہ ٹوٹا دست خشک زہد سے بت خانہ صورت کا

قیامت برہمی ڈالی تو ہجراں کی گھڑی گزری

زمیں ہے گرد شیشہ آسماں شیشہ ہے ساعت کا

بتوں پر لات ماری مہر و مہ سے پھیر لیں آنکھیں

بیاںؔ اللہ رے غمزہ مرے حسن عقیدت کا

khula hai jalwa-e-pinhan se az bas chak wahshat ka

main darta hun kahin parda na phat jae haqiqat ka

kahan le jaega ya rab samand-e-tund wahshat ka

ke pichhe rah gaya koson durahha nar-o-jannat ka

ghubar rang paran hai pharera teri rayat ka

shikast-e-qalb-e-ashiq ghalghala hai teri nusrat ka

kya hai qasd kis ke kungar-e-aiwan-e-rifat ka

ke thama hai tire nale ne paya arsh himmat ka

jhuka di qudsiyon ne be takalluf gardan-e-taat

zahe rutba kaf-e-khak-e-dar wala-e-daulat ka

khule kis tarah parda parda-e-gosh-e-tahayyur par

ke be saut-o-sada hai parda saz-e-bazm-e-wahdat ka

sanam taq-e-haram se dafatan niche utar ae

adab tha bas ke wajib dost ke qasid ke talat ka

hijab tan kasad raunaq kala-e-yusuf hai

taraddud kya hai zindan khana-e-hijran se hijrat ka

salatin ko nahin pata mizaj un ke faqiron ka

ke anqa-e-falak parwaz hai qaf-e-qanaat ka

lab-e-asnam hain qand-e-sukhan se sar ba mehr ab tak

khamoshi se maza puchhe koi teri fasahat ka

maze milte hain kya kya ishq ke lazzat shanason ko

hamen daman-e-zakhm-e-dil ewaz hai khwan-e-nemat ka

tire hairat kade mein farsh hai aina kya o but

ke khasan-e-dar-e-daulat ko hi khatka hai zillat ka

nigah be his-e-khat saghar ki surat hai ke saqi ne

diya hai mardum-e-chashm-e-jahan ko jam hairat ka

talash-e-jalwa-e-maani mein takraya kiye sajde

na tuta dast-e-khushk-e-zohd se but khana surat ka

qayamat barhami dali to hijran ki ghari guzri

zamin hai gard-e-shisha asman shisha hai saat ka

buton par lat mari mehr-o-mah se pher len ankhen

bayan allah re ghamza mire husn-e-aqidat ka