کچھ کہوں کہنا جو میرا کیجیے

کچھ کہوں کہنا جو میرا کیجیے

چاہنے والے کو چاہا کیجیے

حوصلہ تیغ جفا کا رہ نہ جائے

آئیے خون تمنا کیجیے

فتنۂ روز قیامت ہے وہ چال

آج وہ آتے ہیں دیکھا کیجیے

کس کو دیکھا ان کی صورت دیکھ کر

جی میں آتا ہے کہ سجدا کیجیے

فتنے سب برپا کئے ہیں حسن نے

میری الفت کو نہ رسوا کیجیے

حور جنت ان سے کچھ بڑھ کر سہی

ایک دل کیا کیا تمنا کیجیے

کر دیا حیرت نے مجھ کو آئنہ

بے تکلف منہ دکھایا کیجیے

جوش میں آ جائے رحمت کی طرح

ایک اک قطرہ کو دریا کیجیے

نام اگر درکار ہے مثل نگیں

ایک گھر میں جم کے بیٹھا کیجیے

مل چکے اب ملنے والے خاک کے

قبر پر جا جا کے رویا کیجیے

کون تھا کل باعث بے پردگی

آپ مجھ سے آج پردا کیجیے

کل کی باتوں میں تو کچھ نرمی سی ہے

آج پھر قاصد روانا کیجیے

راہ تکتے تکتے آسیؔ چل بسا

کیوں کسی سے آپ وعدا کیجیے

kuchh kahun kahna jo mera kijiye

chahne wale ko chaha kijiye

hausla tegh-e-jafa ka rah na jae

aiye khun-e-tamanna kijiye

fitna-e-roz-e-qayamat hai wo chal

aj wo ate hain dekha kijiye

kis ko dekha un ki surat dekh kar

ji mein ata hai ke sajda kijiye

fitne sab barpa kiye hain husn ne

meri ulfat ko na ruswa kijiye

hur-e-jannat un se kuchh barh kar sahi

ek dil kya kya tamanna kijiye

kar diya hairat ne mujh ko aina

be takalluf munh dikhaya kijiye

josh mein a jae rahmat ki tarah

ek ik qatra ko dariya kijiye

nam agar darkar hai misl-e-nagin

ek ghar mein jam ke baitha kijiye

mil chuke ab milne wale khak ke

qabr par ja ja ke roya kijiye

kaun tha kal bais-e-be pardagi

ap mujh se aj parda kijiye

kal ki baton mein to kuchh narmi si hai

aj phir qasid rawana kijiye

rah takte takte asi chal basa

kyun kisi se ap waada kijiye