کچھ مجھے کہہ کے نہ کہوائیے آپ

کچھ مجھے کہہ کے نہ کہوائیے آپ

بس زباں میری نہ کھلوایئے آپ

دوش پر اور نہ بھاری ہو جائے

میرے سر کی نہ قسم کھائیے آپ

بزم ناز اس کی ہے اے حضرت دل

پاؤں اپنے بھی نہ پھیلائیے آپ

غیر کے شکوے نہ پوچھو شب وصل

پچھلے مردے نہ اکھڑوائیے آپ

لوگ جانیں گے تمہارا عاشق

میں اگر آؤں تو شرمائیے آپ

کچھ پتا میرا بتا دیجئے گا

کچھ خبر میری اگر پائیے آپ

ساتھ میرے نہ کوئی چیخ اٹھے

مجھ کو محفل سے نہ اٹھوائیے آپ

جاتے جاتے کہیں اغیار کے گھر

کاش رستے ہی میں مل جائیے آپ

ایک دم اس کو بھلا کر سالکؔ

جی کسی طرح تو بہلائیے آپ

kuchh mujhe kah ke na kahwaiye ap

bas zaban meri na khulwaiye ap

dosh par aur na bhari ho jae

mere sar ki na qasam khaiye ap

bazm-e-naz us ki hai ai hazrat-e-dil

paon apne bhi na phailaiye ap

ghair ke shikwe na puchho shab-e-wasl

pichhle murde na ukharwaiye ap

log janenge tumhara ashiq

main agar aun to sharmaiye ap

kuchh pata mera bata dijiye ga

kuchh khabar meri agar paiye ap

sath mere na koi chikh uthe

mujh ko mahfil se na uthwaiye ap

jate jate kahin aghyar ke ghar

kash raste hi mein mil jaiye ap

ek dam us ko bhula kar salik

ji kisi tarah to bahlaiye ap