کٹ گئی بے مدعا ساری کی ساری زندگی — غلام بھیک نیرنگ

Arooz is now on the App Store, for iPhone and iPad. Download →

غلام بھیک نیرنگ

کٹ گئی بے مدعا ساری کی ساری زندگی

زندگی سی زندگی ہے یہ ہماری زندگی

کیا ارادوں سے ہے حاصل؟ طاقت و فرصت کہاں

ہائے کہلاتی ہے کیوں بے اختیاری زندگی

اے سر شوریدہ اب تیرے وہ سودا کیا ہوئے!

کیا سدا سے تھی یہی غفلت شعاری زندگی

درد الفت کا نہ ہو تو زندگی کا کیا مزا

آہ و زاری زندگی ہے بے قراری زندگی

آرزوئے زیست بھی یاں یاں آرزوئے دید ہے

تو نہ پیارا ہو تو مجھ کو ہو نہ پیاری زندگی

اور مرجھائے گی تیری چھیڑ سے دل کی کلی

کر نہ دوبھر مجھ پہ اے باد بہاری زندگی

یاں تو اے نیرنگؔ دونوں کے لیے ساماں نہیں

موت بھی مجھ پر گراں ہے گر ہے بھاری زندگی