کچھ امتیاز مجھ کو نہ مے کا نہ سارکا

کچھ امتیاز مجھ کو نہ مے کا نہ سارکا

ناچار ہوں کہ حکم نہیں کشفِ راز کا

لگتی نہیں پلک سے پلک جو تمام شب

ہے ایک شعبدہ مژہِ نیم باز کا

دشمن پئے صبوح جگاتے ہیں یار کو

یہ وقت ہے نسیمِ سحر اھتزاز کا

ایمن ہیں اہلِ جذبہ کہ رہبر ہے ان کے ساتھ

سالک کو ہے خیال نشیب و فراز کا

پھنسنے کے بعد بھی ہے وہی دل شگفتگی

کیا خوب جال ہے نگہِ جاں نواز کا

تقویٰ مرا شعار ہے ، عصمت سرشتِ دوست

پھر مجھ سے کون سا ہے سبب احتراز کا

بارے عجیب بات تو پھیلی جہان میں

پایا کسی نے گو ثمر افشائے راز کا

ساقی کے ہیں اگر یہی الطاف، کیا عجب

ارض و سما میں ہوش نہ ہو امتیاز کا

پیرِ مغاں نے رات کو وہ کچھ دکھا دیا

ہرگز رہا نہ دھیان بھی حسنِ مجاز کا

دیتا ہے داغِ رشک پرندِ سپہر کو

جلوہ تمہاری معجزِ گوہر طراز کا

پانی وضو کو لاؤ، رخِ شمع زرد ہے

مینا اٹھاؤ وقت اب آیا نماز کا

یکتا کسی کو ہم نے نہ دیکھا جہان میں

طولِ امل جواب ہے زلفِ دراز کا

جورِ اجل کو شوخیِ بے جا کہا کیا

تھا مست شیفتہ جو کسی مستِ ناز کا

kuchh imtiyaz mujh ko na mai ka na sarka

nachar hun ke hukm nahin kashf-e-raz ka

lagti nahin palak se palak jo tamam shab

hai ek shobada mizha-e-nim baz ka

dushman piye saboh jagate hain yar ko

ye waqt hai nasim-e-sahar ehtizaz ka

eman hain ahl-e-jazba ke rahbar hai un ke sath

salik ko hai khayal nasheb-o-faraz ka

phansne ke baad bhi hai wahi dil shaguftagi

kya khub jal hai nigah-e-jan nawaz ka

taqwa mira shiar hai, ismat sarisht-e-dost

phir mujh se kaun sa hai sabab ehtiraz ka

bare ajib bat to phaili jahan mein

paya kisi ne go samar ifsha-e-raz ka

saqi ke hain agar yahi altaf, kya ajab

arz-o-sama mein hosh na ho imtiyaz ka

pir-e-mughan ne rat ko wo kuchh dikha diya

hargiz raha na dhyan bhi husn-e-majaz ka

deta hai dagh-e-rashk-e-parind-e-sipehr ko

jalwa tumhari mojiz-e-gauhar taraz ka

pani wuzu ko lao, rukh-e-shama zard hai

mina uthao waqt ab aya namaz ka

yakta kisi ko ham ne na dekha jahan mein

tul-e-amal jawab hai zulf-e-daraz ka

jaur-e-ajal ko shokhi-e-be ja kaha kiya

tha mast-e-shefta jo kisi mast-e-naz ka