کوشش پیہم کو سعیٔ رائیگاں کہتے رہو

کوشش پیہم کو سعیٔ رائیگاں کہتے رہو

ہم چلے اب تم ہماری داستاں کہتے رہو

گفتنی باتیں سہی نا گفتنی باتیں سہی

چپ نہ بیٹھو کوئی افسانہ یہاں کہتے رہو

مصلحت کیا بات جو حق ہی وہ کہہ دو برملا

لاکھ ہوں احباب تم سے بد گماں کہتے رہو

ہم کہ تھے آزاد آزادی کی خاطر مر گئے

جینے والو تم قفس کو آشیاں کہتے رہو

صرف کہنے سے زمیں کیا آسماں ہو جائے گی

کچھ نہیں ہوگا زمیں کو آسماں کہتے رہو

راہ کیا منزل ہے کیسی ہر حقیقت ہے فریب

کارواں کو بھی غبار کارواں کہتے رہو

کیوں کرو اخترؔ کی باتیں وہ تو اک دیوانہ ہے

تم تو یارو اپنی اپنی داستاں کہتے رہو

koshish-e-paiham ko sai-e-raigan kahte raho

ham chale ab tum hamari dastan kahte raho

guftni baten sahi na guftni baten sahi

chup na baitho koi afsana yahan kahte raho

maslahat kya bat jo haq hi wo kah do barmala

lakh hun ahbab tum se bad guman kahte raho

ham ke the azad azadi ki khatir mar gae

jine walo tum qafas ko ashiyan kahte raho

sirf kahne se zamin kya asman ho jaegi

kuchh nahin hoga zamin ko asman kahte raho

rah kya manzil hai kaisi har haqiqat hai fareb

karwan ko bhi ghubar-e-karwan kahte raho

kyun karo akhtar ki baten wo to ik diwana hai

tum to yaro apni apni dastan kahte raho