کون دنیا سے بادہ خوار اٹھا
شیخ علی بخش بیمارکون دنیا سے بادہ خوار اٹھا
چشم تر ابر نو بہار اٹھا
کھا کے غش گر پڑے کھڑے بیٹھے
بیٹھ کر اس ادا سے یار اٹھا
آتش عشق دیکھ کر مالک
الاماں الاماں پکار اٹھا
درد تعظیم مرگ کو دل میں
شب فرقت ہزار بار اٹھا
جیتے جی دور آسمانی میں
نہ زمیں سے یہ خاکسار اٹھا
ابر رحمت نے دے دیا چھینٹا
بعد مرنے کے جب غبار اٹھا
وحشت دل نے پھر نکالے پاؤں
پھر تحمل کا اختیار اٹھا
پھر جنوں فصل گل میں لایا رنگ
پھر میں ہونے کو شرمسار اٹھا
حال بیمارؔ جائے رقت ہے
مرہم دل کا اعتبار اٹھا
چور زخم جگر میں بیٹھ گیا
چارہ گر ہو کے شرمسار اٹھا
kaun duniya se bada khwar utha
chashm-e-tar abr-e-nau bahar utha
kha ke ghash gir pare khare baithe
baith kar is ada se yar utha
atish-e-ishq dekh kar malik
alaman alaman pukar utha
dard-e-taazim marg ko dil mein
shab-e-furqat hazar bar utha
jite ji daur-e-asmani mein
na zamin se ye khaksar utha
abr-e-rahmat ne de diya chhinta
baad marne ke jab ghubar utha
wahshat-e-dil ne phir nikale paon
phir tahammul ka ikhtiyar utha
phir junun fasl-e-gul mein laya rang
phir main hone ko sharmsar utha
hal bimar jae riqqat hai
marham-e-dil ka etibar utha
chur zakhm-e-jigar mein baith gaya
chara gar ho ke sharmsar utha