کوئی ارمان مرے دل کا نکلنے نہ دیا

کوئی ارمان مرے دل کا نکلنے نہ دیا

شوخیوں نے تری فقرہ بھی تو چلنے نہ دیا

پے بہ پے تیر نظر آئے سنبھلنے نہ دیا

چاندنی چوک سے بسمل کو نکلنے نہ دیا

جب سسکنے کا نہیں حکم تڑپنا کیسا

اتنا ارمان بھی قاتل نے نکلنے نہ دیا

بزم ہستی میں ابھی آ کے تو ہم بیٹھے تھے

یوں اجل آئی کہ زانو بھی بدلنے نہ دیا

شب فرقت سے ہو حاصل مجھے کس طرح نجات

سخت جانی نے مرا دم بھی نکلنے نہ دیا

رحم کر پردۂ فانوس سے اے شمع نکل

اس قدر ظلم کہ پروانوں کو جلنے نہ دیا

یہ دبایا قد موزوں نے ترے طوبیٰ کو

باغ فردوس میں بھی پھولنے پھلنے نہ دیا

خوب نظارۂ قاتل رہا اکبرؔ تہ تیغ

ہاتھ رک رک گیا تقدیر نے چلنے نہ دیا

koi arman mire dil ka nikalne na diya

shokhiyon ne tiri fiqra bhi to chalne na diya

pe ba pe tir-e-nazar ae sambhalne na diya

chandni chok se bismil ko nikalne na diya

jab sisakne ka nahin hukm tarapna kaisa

itna arman bhi qatil ne nikalne na diya

bazm-e-hasti mein abhi a ke to ham baithe the

yun ajal ai ke zanu bhi badalne na diya

shab-e-furqat se ho hasil mujhe kis tarah najat

sakht jani ne mira dam bhi nikalne na diya

rahm kar parda-e-fanus se ai shama nikal

is qadar zulm ke parwanon ko jalne na diya

ye dabaya qad-e-mauzun ne tire tuba ko

bagh-e-firdaus mein bhi phulne phalne na diya

khub nazara-e-qatil raha akbar tah-e-tegh

hath ruk ruk gaya taqdir ne chalne na diya