کوئی بات ایسی آج اے میری گل رخسار بن جائے

کوئی بات ایسی آج اے میری گل رخسار بن جائے

کہ بلبل باتوں باتوں میں دم گفتار بن جائے

عیاں ہو جذب شوق ایسا حسیں آئیں زیارت کو

مری تربت کا میلہ مصر کا بازار بن جائے

مرے ہنسنے پہ وہ کہتے ہیں ایسا بھی نہ ہو بے خود

کہ کوئی آدمی سے قہقہہ دیوار بن جائے

تعجب کچھ نہیں ہے گر وفور سوز فرقت سے

مرا ہر موئے تن منقار موسیقار بن جائے

ٹہلتے گر چلے آئیں وہ داغوں کے تماشے کو

ابھی سرو چراغاں میرا جسم زار بن جائے

برہمن شیخ کو کر دے نگاہ ناز اس بت کی

گلوئے زہد میں تار نظر زنار بن جائے

اگر گھر سے بقصد سیر نکلے وہ کماں ابرو

تو بہر طائر دل ہر مژہ سو فار بن جائے

تبسم کر تماشا دیکھ کے وحشت کا پھر ظالم

مرا چاک گریباں زخم دامن دار بن جائے

یوں ہی ہنس ہنس کے تم عاشق کا رونا دیکھتے جاؤ

کہ ہر تار نظر اک موتیوں کا ہار بن جائے

بڑھاؤ منزلت تیغ ادا کی تند خوئی سے

مناسب ہے جو یہ شمشیر جوہر دار بن جائے

اگر آئینۂ دل صاف ہو حسن توجہ سے

ہر اک آنکھوں کا پردہ پردۂ اسرار بن جائے

یہی ہے خوں بہا چل کر ذرا کہہ دو اشارے سے

حبیبؔ خستہ کا مرقد پس دیوار بن جائے

koi bat aisi aj ai meri gul rukhsar ban jae

ke bulbul baton baton mein dam-e-guftar ban jae

ayan ho jazb-e-shauq aisa hasin aen ziyarat ko

miri turbat ka mela misr ka bazar ban jae

mire hansne pe wo kahte hain aisa bhi na ho be khud

ke koi admi se qahqaha diwar ban jae

taajjub kuchh nahin hai gar wafur-e-soz-e-furqat se

mira har mu-e-tan minqar musiqar ban jae

tahalte gar chale aen wo daghon ke tamashe ko

abhi sarw-e-charaghan mera jism-e-zar ban jae

barahman shaikh ko kar de nigah-e-naz us but ki

galo-e-zohd mein tar-e-nazar zunnar ban jae

agar ghar se baqsad sair nikle wo kaman abru

tu bahr-e-tair-e-dil har mizha so far ban jae

tabassum kar tamasha dekh ke wahshat ka phir zalim

mira chak-e-gareban zakhm-e-daman dar ban jae

yun hi hans hans ke tum ashiq ka rona dekhte jao

ke har tar-e-nazar ik motiyon ka har ban jae

barhao manzilat tegh-e-ada ki tund khui se

munasib hai jo ye shamshir-e-jauhar dar ban jae

agar aina-e-dil saf ho husn tawajjoh se

har ik ankhon ka parda parda-e-asrar ban jae

yahi hai khun baha chal kar zara kah do ishare se

habib khasta ka marqad pas-e-diwar ban jae