کوئی آباد منزل ہم جو ویراں دیکھ لیتے ہیں

کوئی آباد منزل ہم جو ویراں دیکھ لیتے ہیں

بہ حسرت سوئے چرخ فتنہ ساماں دیکھ لیتے ہیں

نظر حسن آشنا ٹھہری وہ خلوت ہو کہ جلوت ہو

جب آنکھیں بند کیں تصویر جاناں دیکھ لیتے ہیں

شب وعدہ ہمیشہ سے یہی معمول ہے اپنا

سحر تک راہ شوخ سست پیماں دیکھ لیتے ہیں

خدا نے دی ہیں جن روشن دلوں کو دوربیں نظریں

سواد کفر میں وہ نور ایماں دیکھ لیتے ہیں

دل بیتاب کا اصرار مانع شرم رسوائی

بچا کر سب کی نظریں سوئے جاناں دیکھ لیتے ہیں

وہ خود سر سے قدم تک ڈوب جاتے ہیں پسینے میں

بھری محفل میں جو ان کو پشیماں دیکھ لیتے ہیں

ٹپک پڑتے ہیں شبنم کی طرح بے اختیار آنسو

چمن میں جب کبھی گل ہائے خنداں دیکھ لیتے ہیں

نگاہ ناز کی مستانہ یہ نشتر زنی کیسی

بوقت فصد رگ زن بھی رگ جاں دیکھ لیتے ہیں

اسیران ستم کے پاسبانوں پر ہیں تاکیدیں

بدلتے ہیں جو پہرا قفل زنداں دیکھ لیتے ہیں

صفیؔ رہتے ہیں جان و دل فدا کرنے پہ آمادہ

مگر اس وقت جب انساں کو انساں دیکھ لیتے ہیں

koi abad manzil ham jo wiran dekh lete hain

ba hasrat su-e-charkh-e-fitna saman dekh lete hain

nazar husn ashna thahri wo khalwat ho ke jalwat ho

jab ankhen band-e-kin taswir janan dekh lete hain

shab-e-waada hamesha se yahi maamul hai apna

sahar tak rah shokh-e-sust paiman dekh lete hain

khuda ne di hain jin raushan dilon ko durbin nazren

sawad-e-kufr mein wo nur-e-iman dekh lete hain

dil-e-betab ka israr mane sharm-e-ruswai

bacha kar sab ki nazren su-e-janan dekh lete hain

wo khud sar se qadam tak dub jate hain pasine mein

bhari mahfil mein jo un ko pasheman dekh lete hain

tapak parte hain shabnam ki tarah be ikhtiyar ansu

chaman mein jab kabhi gul ha-e-khandan dekh lete hain

nigah-e-naz ki mastana ye nashtar zani kaisi

boqat fasd-e-rag zan bhi rag-e-jan dekh lete hain

asiran-e-sitam ke pasbanon par hain takiden

badalte hain jo pahra qufl-e-zindan dekh lete hain

safi rahte hain jan-o-dil fida karne pe amada

magar is waqt jab insan ko insan dekh lete hain