کوئی جہاں میں نہ یا رب ہو مبتلائے فراق

کوئی جہاں میں نہ یا رب ہو مبتلائے فراق

کسی کی جان کی دشمن نہ ہو بلائے فراق

ہزار طرح کے صدمے اسے گوارا ہیں

مگر اٹھا نہیں سکتا ہے دل جفائے فراق

لبوں پہ جان ہے اب صدمہ ہائے دوری سے

خبر وصال کی دیتی ہے انتہائے فراق

زبان بند ہے یہ جوش غم کا عالم ہے

بیان ہو نہیں سکتا ہے ماجرائے فراق

کریں جو ضبط کلیجا سراہیے ان کا

کہ آسماں کو بلاتے ہیں نالہ ہائے فراق

جدا حفیظؔ ہوا کون تیرے پہلو سے

لبوں پر آٹھ پہر ہے جو ہائے ہائے فراق

koi jahan mein na ya rab ho mubtala-e-firaq

kisi ki jan ki dushman na ho bala-e-firaq

hazar tarah ke sadme use gawara hain

magar utha nahin sakta hai dil jafa-e-firaq

labon pe jan hai ab sadma ha-e-duri se

khabar wisal ki deti hai intiha-e-firaq

zaban band hai ye josh-e-gham ka alam hai

bayan ho nahin sakta hai majra-e-firaq

karen jo zabt kaleja sarahye un ka

ke asman ko bulate hain nala ha-e-firaq

juda hafiz hua kaun tere pahlu se

labon par ath pahar hai jo hae hae firaq