کوئل نیں آ کے کوک سنائی بسنت رت

کوئل نیں آ کے کوک سنائی بسنت رت

بورائے خاص و عام کہ آئی بسنت رت

وہ زرد پوش جس کوں بھر آغوش میں لیا

گویا کہ تب گلے سیں لگائی بسنت رت

وہ زرد پوش جس کا کہ گن گاوتے ہیں ہم

شوخی نیں اس کی ناچ نچائی بسنت رت

غنچے نیں اس بہار میں کڈوایا اپنا دل

بلبل چمن میں پھول کے گائی بسنت رت

ٹیسو کے پھول دشنۂ خونی ہوے اسے

برہن کے جی کوں ہے یہ کسائی بسنت رت

گائے ہنڈول آج کلاونت کھلس کھلس

ہر تان بیچ کیا کے پھلائی بسنت رت

بلبل ہوا ہے دیکھ سدا رنگ کی بہار

اس سال آبروؔ کوں بن آئی بسنت رت

koyal nain a ke kok sunai basant rut

bora-e-khas-o-am ke ai basant rut

wo zard posh jis kun bhar aghosh mein liya

goya ke tab gale sin lagai basant rut

wo zard posh jis ka ke gin gaote hain ham

shokhi nain us ki nach nachai basant rut

ghunche nain is bahar mein kadwaya apna dil

bulbul chaman mein phul ke gai basant rut

tesu ke phul dashna-e-khuni hue use

birhan ke ji kun hai ye kasai basant rut

gae handol aj kalawant khalas khalas

har tan bich kya ke phalai basant rut

bulbul hua hai dekh sada rang ki bahar

is sal abru kun ban ai basant rut