بیان سن نہ سکا جب کوئی بیاں کی طرح

بیان سن نہ سکا جب کوئی بیاں کی طرح

سنایا حال دل زار داستاں کی طرح

یہ راز عشق ہمیشہ کو راز رہ جاتا

نگاہ کام نہ کرتی اگر زباں کی طرح

کہیں ہے بوئے تمنا گل مراد کہیں

نہال دل کا ہے پھیلاؤ گلستاں کی طرح

کسی کے خندۂ بیجا کا اب نہیں شکوہ

فغاں بھی دل سے نکلتی نہیں فغاں کی طرح

خیال میں ہیں بہاریں نگاہ میں گلشن

گزر رہی ہے قفس میں بھی آشیاں کی طرح

بنی ہے دشمن ہر آرزو وہی حسرت

لگا کے سینے سے رکھتا ہوں اس کو جاں کی طرح

جبین شوق بتائے گی لذت سجدہ

نہ دیر ہے نہ حرم ان کے آستاں کی طرح

زمانہ آج بھی ناواقف حقیقت ہے

کبھی بہار چمن ہوں کبھی خزاں کی طرح

مٹا کے ہستئ دل بھی سکون دل نہ ملا

زمیں ہے سایہ فگن سر پہ آسماں کی طرح

کبھی نہ جھک کے رہیں سر بلندیاں میری

زمیں پہ عمر گزاری ہے آسماں کی طرح

منیرؔ ان کی نظر نے بدل دیا مجھ کو

کہ اب ہنسی بھی جو آتی ہے تو فغاں کی طرح

bayan sun na saka jab koi bayan ki tarah

sunaya hal-e-dil zar dastan ki tarah

ye raz-e-ishq hamesha ko raz rah jata

nigah kam na karti agar zaban ki tarah

kahin hai bu-e-tamanna-e-gul murad kahin

nihal dil ka hai phailao gulsitan ki tarah

kisi ke khanda-e-beja ka ab nahin shikwa

fughan bhi dil se nikalti nahin fughan ki tarah

khayal mein hain baharen nigah mein gulshan

guzar rahi hai qafas mein bhi ashiyan ki tarah

bani hai dushman har arzu wahi hasrat

laga ke sine se rakhta hun us ko jan ki tarah

jabin-e-shauq bataegi lazzat-e-sajda

na der hai na haram un ke astan ki tarah

zamana aj bhi nawaqif-e-haqiqat hai

kabhi bahar-e-chaman hun kabhi khizan ki tarah

mita ke hasti-e-dil bhi sukun-e-dil na mila

zamin hai saya fagan sar pe asman ki tarah

kabhi na jhuk ke rahen sar bulandiyan meri

zamin pe umr guzari hai asman ki tarah

munir un ki nazar ne badal diya mujh ko

ke ab hansi bhi jo ati hai to fughan ki tarah