کل پتنگ اس نے جو بازار سے منگوا بھیجا

کل پتنگ اس نے جو بازار سے منگوا بھیجا

سادہ مانجھے کا اسے ماہ نے گولا بھیجا

نام کا اس کے جو میں کہہ کے معما بھیجا

یہ بھی حرکت ہے بری اس نے یہ فرما بھیجا

اس کی فرمائشیں کیا کیا نہ بجا لایا میں

کبھی پٹا کبھی لچکا کبھی گوٹا بھیجا

قیس و فرہاد کو جاگیر یہی عشق نے دی

ایک کو کوہ ملا ایک کو صحرا بھیجا

سوزن و شانہ و آئینہ خریدے ہم نے

کبھی بھیجا بھی تو اس گل کو یہ سودا بھیجا

پھر تہ خاک مرا داغ جگر تازہ ہوا

کس نے تربت پہ مری لالۂ حمرا بھیجا

عاشقوں میں اسے گنتے نہیں وارستہ مزاج

جس نے تا نوک قلم حرف تمنا بھیجا

داغ دل زخم جگر کلفت غم درد فراق

حضرت عشق نے کیا کیا نہیں تحفہ بھیجا

مصحفیؔ جا کے وہاں بھول گئے کیا ہم کو

کبھی یاران عدم نے جو نہ پرزہ بھیجا

kal patang us ne jo bazar se mangwa bheja

sada manjhe ka use mah ne gola bheja

nam ka us ke jo main kah ke muamma bheja

ye bhi harkat hai buri us ne ye farma bheja

us ki farmaishen kya kya na baja laya mein

kabhi pita kabhi lachka kabhi gota bheja

qais-o-farhad ko jagir yahi ishq ne di

ek ko koh mila ek ko sahra bheja

sozan-o-shana-o-aina kharide ham ne

kabhi bheja bhi to us gul ko ye sauda bheja

phir tah-e-khak mira dagh-e-jigar taza hua

kis ne turbat pe miri lala-e-hamra bheja

ashiqon mein use ginte nahin warasta mizaj

jis ne ta nok-e-qalam harf-e-tamanna bheja

dagh-e-dil zakhm-e-jigar kulfat-e-gham dard-e-firaq

hazrat-e-ishq ne kya kya nahin tohfa bheja

mushafi ja ke wahan bhul gae kya ham ko

kabhi yaran-e-adam ne jo na purza bheja