کلی کہتے ہیں اس کا سا دہن ہے — میر تقی میر (Mir Taqi Mir)

کلی کہتے ہیں اس کا سا دہن ہے

سنا کریے کہ یہ بھی اک سخن ہے

ٹپکتے درد ہیں آنسو کی جاگا

الٰہی چشم یا زخم کہن ہے

خبر لے پیر کنعاں کی کہ کچھ آج

نپٹ آوارہ بوئے پیرہن ہے

نہیں دامن میں لالہ بے ستوں کے

کوئی دل داغ خون کوہ کن ہے

شہادت گاہ ہے باغ زمانہ

کہ ہر گل اس میں اک خونیں کفن ہے

کروں کیا حسرت گل کو وگرنہ

دل پر داغ بھی اپنا چمن ہے

جو دے آرام ٹک آوارگی میرؔ

تو شام غربت اک صبح وطن ہے