کل میرؔ نے کیا کیا کی مے کے لیے بیتابی

کل میرؔ نے کیا کیا کی مے کے لیے بیتابی

آخر کو گرو رکھا سجادۂ محرابی

جاگا ہے کہیں وہ بھی شب مرتکب مے ہو

یہ بات سجھاتی ہے ان آنکھوں کی بے خوابی

کیا شہر میں گنجائش مجھ بے سر و پا کو ہو

اب بڑھ گئے ہیں میرے اسباب کم اسبابی

دن رات مری چھاتی جلتی ہے محبت میں

کیا اور نہ تھی جاگا یہ آگ جو یاں دابی

سو ملک پھرا لیکن پائی نہ وفا اک جا

جی کھا گئی ہے میرا اس جنس کی نایابی

خوں بستہ نہ کیوں پلکیں ہر لحظہ رہیں میری

جاتے نہیں آنکھوں سے لب یار کے عنابی

جنگل ہی ہرے تنہا رونے سے نہیں میرے

کوہوں کی کمر تک بھی جا پہنچی ہے سیرابی

تھے ماہ وشاں کل جو ان کوٹھوں پہ جلوے میں

ہے خاک سے آج ان کی ہر صحن میں مہتابی

کل میرؔ جو یاں آیا طور اس کا بہت بھایا

وہ خشک لبی تس پر جامہ گلے میں آبی

kal mir ne kya kya ki mai ke liye betabi

akhir ko giro rakha sajjada-e-mehrabi

jaga hai kahin wo bhi shab murtakib mai ho

ye bat sujhati hai in ankhon ki be khwabi

kya shahr mein gunjaish mujh be sar-o-pa ko ho

ab barh gae hain mere asbab kam asbabi

din rat miri chhati jalti hai mohabbat mein

kya aur na thi jaga ye ag jo yan dabi

so mulk phira lekin pai na wafa ik ja

ji kha gai hai mera is jins ki nayabi

khun basta na kyun palken har lahza rahen meri

jate nahin ankhon se lab yar ke unnabi

jangal hi hare tanha rone se nahin mere

kohon ki kamar tak bhi ja pahunchi hai sairabi

the mah washan kal jo in kothon pe jalwe mein

hai khak se aj un ki har sehn mein mahtabi

kal mir jo yan aya tur us ka bahut bhaya

wo khushk labi tis par jama gale mein abi