کلام سخت کہہ کہہ کر وہ کیا ہم پر برستے ہیں

کلام سخت کہہ کہہ کر وہ کیا ہم پر برستے ہیں

لب ان کے لعل ہیں پر لعل سے پتھر برستے ہیں

بنا گر قطرہ واں گوہر تو یاں گوہر برستے ہیں

ہمارے دیدۂ تر ابر سے بہتر برستے ہیں

عرق رخ کا نقاب رخ سے جب ٹپکا تو ہم سمجھے

کہ مہ پر چھا رہا ہے ابر اور اختر برستے ہیں

جھپکنا جس نے دیکھا ہو تری پلکوں کا وہ جانے

وگرنہ کون مانے گر کہوں خنجر برستے ہیں

تماشا دیکھ سیلاب بہاری پر حبابوں کا

اٹھا لا شیشہ ساقی ابر سے ساغر برستے ہیں

ترے در پر گدا و شہ کے غش کھا کھا کے گرنے سے

دل و جاں بہتے پھرتے ہیں سر و افسر برستے ہیں

سرشک چشم سے نالے رواں ہوتے نہیں دیکھے

کہے کون اس کو رونا دیدہ ہائے تر برستے ہیں

جلا خرمن تو کیا پر جو دھوئیں اٹھتے ہیں خرمن سے

ستم ہے بن کے بادل کشت دشمن پر برستے ہیں

مری ہستی مگر فصل بہار شعلہ ہے ناظمؔ

شرر پھلتے ہیں داغ اگتے ہیں اور اخگر برستے ہیں

kalam-e-sakht kah kah kar wo kya ham par baraste hain

lab un ke laal hain par laal se patthar baraste hain

bana gar qatra wan gauhar to yan gauhar baraste hain

hamare dida-e-tar abr se behtar baraste hain

araq rukh ka naqab-e-rukh se jab tapka to ham samjhe

ke mah par chha raha hai abr aur akhtar baraste hain

jhapakna jis ne dekha ho tiri palkon ka wo jane

wagarna kaun mane gar kahun khanjar baraste hain

tamasha dekh sailab-e-bahari par hababon ka

utha la shisha saqi abr se saghar baraste hain

tire dar par gada-o-shah ke ghash kha kha ke girne se

dil-o-jan bahte phirte hain sar-o-afsar baraste hain

sarishk-e-chashm se nale rawan hote nahin dekhe

kahe kaun us ko rona dida ha-e-tar baraste hain

jala khirman to kya par jo dhuen uthte hain khirman se

sitam hai ban ke badal kisht-e-dushman par baraste hain

miri hasti magar fasl-e-bahar-e-shola hai nazim

sharar phalte hain dagh ugte hain aur akhgar baraste hain