کم فہم ہیں تو کم ہیں پریشانیوں میں ہم

کم فہم ہیں تو کم ہیں پریشانیوں میں ہم

دانائیوں سے اچھے ہیں نادانیوں میں ہم

شاید رقیب ڈوب مریں بحرِ شرم میں

ڈوبیں گے موجِ اشک کی طغیانیوں میں ہم

محتاجِ فیضِ نامیہ کیوں ہوتے اس قدر

کرتے جو سوچ کچھ جگر افشانیوں میں ہم

پہنچائی ہم نے مشق یہاں تک کہ ہو گئے

استادِ عندلیب، نواخوانیوں میں ہم

غیروں کے ساتھ آپ بھی اٹھتے ہیں بزم سے

لو میزبان بن گئے مہمانیوں میں ہم

جن جن کے تو مزار سے گزرا وہ جی اٹھے

باقی رہے ہیں ایک ترے فانیوں میں ہم

گستاخیوں سے غیر کی ان کو ملال ہے

مشہور ہوتے کاش ادب دانیوں میں ہم

دیکھا جو زلفِ یار کو تسکین ہو گئی

یک چند مضطرب تھے پریشانیوں میں ہم

آنکھوں سے یوں اشارۂ دشمن نہ دیکھتے

ہوتے نہ اس قدر جو نگہبانیوں میں ہم

جو جان کھو کے پائیں تو فوزِ عظیم ہے

وہ چیز ڈھونڈتے ہیں تن آسانیوں میں ہم

پیرِ مغاں کے فیضِ توجہ سے شیفتہ

اکثر شراب پیتے ہیں روحانیوں میں ہم

kam fahm hain to kam hain pareshaniyon mein ham

danaiyon se achchhe hain nadaniyon mein ham

shayad raqib dub maren bahr-e-sharm mein

dubenge mauj-e-ashk ki tughyaniyon mein ham

mohtaj-e-faiz-e-namiya kyun hote is qadar

karte jo soch kuchh jigar afshaniyon mein ham

pahunchai ham ne mashq yahan tak ke ho gae

ustad-e-andalib, nauikhwaniyon mein ham

ghairon ke sath ap bhi uthte hain bazm se

lo mezban ban gae mehmaniyon mein ham

jin jin ke to mazar se guzra wo ji uthe

baqi rahe hain ek tire faniyon mein ham

gustakhiyon se ghair ki un ko malal hai

mashhur hote kash adab daniyon mein ham

dekha jo zulf-e-yar ko taskin ho gai

yak chand muztarib the pareshaniyon mein ham

ankhon se yun ishara-e-dushman na dekhte

hote na is qadar jo nigahbaniyon mein ham

jo jan kho ke paen to fauz-e-azim hai

wo chiz dhundte hain tan asaniyon mein ham

pir-e-mughan ke faiz-e-tawajjoh se shefta

aksar sharab pite hain ruhaniyon mein ham