کسی کی جبہ سائی سے کبھی گھستا نہیں پتھر

کسی کی جبہ سائی سے کبھی گھستا نہیں پتھر

وہ چوکھٹ موم کی چوکھٹ ہے یا میری جبیں پتھر

کھلا اب رکھتے ہیں پہلو میں پنہاں نازنیں پتھر

نہ تھا معلوم ہیں قلب بتان و مہ جبیں پتھر

بٹھایا خاتم عزت پہ تیرے نام نامی نے

وگرنہ ہے یہ ظاہر تھا حقیقت میں نگیں پتھر

دکھائے پھر نہ کیوں تاثیر اپنی جذب روحانی

یقیں ہو جائے جب حاجت روا ہے بالیقیں پتھر

تلاش یار میں کیا خار دامن گیر ہمت ہوں

ہوئے نادم ملے جب سد رہ بن کر کہیں پتھر

جو میں اے کوہکن دوں جان شیریں عشق شیریں میں

تو دکھلائے بجائے شیر جوئے آبگیں ادائیوں پتھر

گرا دوں فیض اعجاز نبوت سے وہ مومن ہوں

چھپائیں پھر مخالف گر میان آستیں پتھر

پس مردن رہے قلب و جگر میں گر یہی سوزش

تو لوح سنگ مرمر ہوگی از خود آتشیں پتھر

یہ کہتا ہے کسی نا مہرباں کا مہرباں ہونا

پسیجیں گے تری گرمی سے آہ آتشیں پتھر

گریں ہر سنگ دل پر بجلیاں ایسی حوادث کی

کہ دیتے ہیں گواہی تیری آہ آتشیں پتھر

حبیبؔ آئے کہاں سے تازگی نخل مضامیں میں

جہاں تک دیکھیے ہے یک قلم یہ گل زمیں پتھر

kisi ki jubba sai se kabhi ghista nahin patthar

wo chaukhat mom ki chaukhat hai ya meri jabin patthar

khula ab rakhte hain pahlu mein pinhan naznin patthar

na tha maalum hain qalb-e-butan-o-mah jabin patthar

bithaya khatam izzat pe tere nam-e-nami ne

wagarna hai ye zahir tha haqiqat mein nagin patthar

dikhae phir na kyun tasir apni jazb-e-ruhani

yaqin ho jae jab hajat rawa hai bilyaqin patthar

talash-e-yar mein kya khar daman gir himmat hun

hue nadim mile jab sadd-e-rah ban kar kahin patthar

jo main ai kohkin dun jan-e-shirin ishq shirin mein

tu dikhlae bajae sher ju-e-abgin adaiyon patthar

gira dun faiz-e-ejaz-e-nabuwwat se wo momin hun

chhupaen phir mukhalif gar miyan-e-astin patthar

pas murdan rahe qalb-o-jigar mein gar yahi sozish

tu lauh-e-sang-e-marmar hogi az khud atishin patthar

ye kahta hai kisi na mehrban ka mehrban hona

pasijenge tiri garmi se ah atishin patthar

giren har sang dil par bijliyan aisi hawadis ki

ke dete hain gawahi teri ah-e-atishin patthar

habib ae kahan se tazgi nakhl-e-mazamin mein

jahan tak dekhiye hai yak qalam ye gul zamin patthar