کسے اپنا بنائیں کوئی اس قابل نہیں ملتا

کسے اپنا بنائیں کوئی اس قابل نہیں ملتا

یہاں پتھر بہت ملتے ہیں لیکن دل نہیں ملتا

محبت کا صلہ ایثار کا حاصل نہیں ملتا

وہ نظریں بارہا ملتی ہیں لیکن دل نہیں ملتا

تمہارا روٹھنا تمہید تھی افسانۂ غم کی

زمانہ ہو گیا ہم سے مزاج دل نہیں ملتا

جہاں تک دیکھتا ہوں میں جہاں تک میں نے سمجھا ہے

کوئی تیرے سوا تعریف کے قابل نہیں ملتا

حرم کی منزلیں ہوں یا صنم خانے کی راہیں ہوں

خدا ملتا نہیں جب تک مقام دل نہیں ملتا

مسافر اپنی منزل پر پہنچ کر چین پاتے ہیں

وہ موجیں سر پٹکتی ہیں جنہیں ساحل نہیں ملتا

ہم اپنا غم لیے بیٹھے ہیں اس بزم طرب میں بھی

کسی نغمے سے اب مخمورؔ ساز دل نہیں ملتا

kise apna banaen koi is qabil nahin milta

yahan patthar bahut milte hain lekin dil nahin milta

mohabbat ka sila isar ka hasil nahin milta

wo nazren barha milti hain lekin dil nahin milta

tumhara ruthna tamhid thi afsana-e-gham ki

zamana ho gaya ham se mizaj-e-dil nahin milta

jahan tak dekhta hun main jahan tak main ne samjha hai

koi tere siwa taarif ke qabil nahin milta

haram ki manzilen hun ya sanam khane ki rahen hun

khuda milta nahin jab tak maqam-e-dil nahin milta

musafir apni manzil par pahunch kar chain pate hain

wo maujen sar patakti hain jinhen sahil nahin milta

ham apna gham liye baithe hain is bazm-e-tarab mein bhi

kisi naghme se ab makhmur saz-e-dil nahin milta