کسی کے نقش قدم کا نشاں نہیں ملتا

کسی کے نقش قدم کا نشاں نہیں ملتا

وہ رہ گزر ہوں جسے کارواں نہیں ملتا

قدم قدم پہ تری راہ میں فلک حائل

مجھے تلاش سے بھی آسماں نہیں ملتا

انہیں طریقۂ لطف و کرم نہیں معلوم

ہمیں سلیقۂ آہ و فغاں نہیں ملتا

عروس دہر کو غازہ بھی چاہئے لیکن

غبار جادۂ امن و اماں نہیں ملتا

دھڑک رہا ہے ہر اہل وفا کے سینے میں

ہمارا درد بھرا دل کہاں نہیں ملتا

سبھی کو دعوئے مہر و وفا ہے دنیا میں

جو مہرباں نہ ہو وہ مہرباں نہیں ملتا

غم حیات کے پر ہول قہقہوں کے سوا

کہیں سے اپنا جواب فغاں نہیں ملتا

دل شکستہ کو لے جائیے کہاں باسطؔ

دماغ نخوت شیشہ گراں نہیں ملتا

kisi ke naqsh-e-qadam ka nishan nahin milta

wo rah guzar hun jise karwan nahin milta

qadam qadam pe tiri rah mein falak hail

mujhe talash se bhi asman nahin milta

unhen tariqa-e-lutf-o-karam nahin maalum

hamen saliqa-e-ah-o-fughan nahin milta

urus-e-dahr ko ghaza bhi chahiye lekin

ghubar-e-jada-e-amn-o-aman nahin milta

dharak raha hai har ahl-e-wafa ke sine mein

hamara dard bhara dil kahan nahin milta

sabhi ko doe mehr-o-wafa hai duniya mein

jo mehrban na ho wo mehrban nahin milta

gham-e-hayat ke pur haul qahqahon ke siwa

kahin se apna jawab-e-fughan nahin milta

dil-e-shikasta ko le jaiye kahan basit

dimagh nakhwat shisha giran nahin milta