بیچنے آئے کوئی کیا دل شیدا لے کر

بیچنے آئے کوئی کیا دل شیدا لے کر

دام دیتے ہی نہیں آپ تو سودا لے کر

چار دن بھی تو نہ رکھا دل شیدا لے کر

آپ نے ہم سے بھی کمبخت کو کھویا لے کر

قتل کے بعد نزاکت سے جو تھک جاتے ہیں

بیٹھ جاتے ہیں وہ کشتے کا سہارا لے کر

غیر کا قتل کچھ ایسا تو نہیں ہے مشکل

چھوڑ دو ہاتھ کوئی نام ہمارا لے کر

سانس کے ساتھ جو ہوتی ہے کھٹک سینے میں

ضعف سے درد بھی اٹھتا ہے سہارا لے کر

آ گیا مجھ کو نظر اپنی وفا کا انجام

میں نے تلوار کو قاتل سے جو دیکھا لے کر

اب تو بیخودؔ کو یہ دعویٰ ہے بقول استاد

آدمی عشق کرے نام ہمارا لے کر

bechne ae koi kya dil-e-shaida le kar

dam dete hi nahin ap to sauda le kar

char din bhi to na rakha dil-e-shaida le kar

ap ne ham se bhi kambakht ko khoya le kar

qatl ke baad nazakat se jo thak jate hain

baith jate hain wo kushte ka sahara le kar

ghair ka qatl kuchh aisa to nahin hai mushkil

chhor do hath koi nam hamara le kar

sans ke sath jo hoti hai khatak sine mein

zof se dard bhi uthta hai sahara le kar

a gaya mujh ko nazar apni wafa ka anjam

main ne talwar ko qatil se jo dekha le kar

ab to bekhud ko ye daawa hai baqaul-e-ustad

admi ishq kare nam hamara le kar