کعبہ سے مجھ کو لائے سواد کنشت میں

کعبہ سے مجھ کو لائے سواد کنشت میں

اصلاح دی بتوں نے خط سر نوشت میں

پھرتے ہیں کوچۂ بت قدسی سرشت میں

کفارۂ شراب میں دیتا ہوں نقد ہوش

سرگرم ہوں تلافیٔ اعمال زشت میں

اکثر جزائے سجدہ میں کھانی ہیں ٹھوکریں

لکھا ہے کیا خط کف پا سر نوشت میں

حوروں سے گرمیاں جو کہوں اس شریر کی

لگ جائے آگ آتش گل سے بہشت میں

سنتی ہے روز نغمۂ زنجیر عاشقاں

وہ زلف بھی ہے سلسلۂ اہل چشت میں

زنداں سے آنکھیں سینکنے اس گل کے گھر گئے

دوزخ سے آگ لینے چلے ہم بہشت میں

بیگانے اک ہمیں نظر آئے پس فنا

بے دردوں کا ہجوم ہے باغ بہشت میں

بت خانے میں سفیدیٔ حسن فرنگ ہے

گرجے کی روشنی ہے سواد کنشت میں

جل جل کے خاک ہوتے ہیں بے اشک و آہ ہم

آب و ہوا نہیں ہے ہماری سرشت میں

گرمی میں تیرے کوچہ نشینوں کے واسطے

پنکھے ہیں قدسیوں کے پروں کے بہشت میں

سونا کساؤں اشرفی داغ سجدہ کا

سنگ محک لگاؤں بنائے کنشت میں

بجلی چمک گئی جو ہنسی میں پھڑک گئے

شوخی بھری ہوئی ہے تمہاری سرشت میں

تصویریں تیری دست حنائی کی لے گئے

چھاپے لہو کے ہم نے لگائے بہشت میں

کرتی ہیں خون چرخ بتوں کی تعلیاں

رنگ شفق لگاتی ہے سقف کنشت میں

ابر بہار جوہر شمشیر یار تھے

گلہائے زخم کھل گئے اردی بہشت میں

تقدیر میں ہے تیری دہان و کمر کا عشق

سر نہاں لکھا ہے مری سر نوشت میں

دی جان ایک حور کے بوسے کی چاٹ پر

قسمت نے مجھ کو زہر دیا ہے بہشت میں

چوروں سے گفتگوئے خط سبز یار ہے

طوطی کسی کا بول رہا ہے بہشت میں

ادنیٰ غلام شاہ ولایت ہوئے منیرؔ

دشت نجف کی خاک ہے میری سرشت میں

kaaba se mujh ko lae sawad-e-kinshat mein

islah di buton ne khat-e-sar nawisht mein

phirte hain kucha-e-but-e-qudsi sarisht mein

kaffara-e-sharab mein deta hun naqd-e-hosh

sargarm hun talafi-e-aamal zisht mein

aksar jaza-e-sajda mein khani hain thokaren

likha hai kya khat-e-kaf-e-pa sar nawisht mein

huron se garmiyan jo kahun is sharir ki

lag jae ag atish-e-gul se bahisht mein

sunti hai roz-e-naghma-e-zanjir-e-ashiqan

wo zulf bhi hai silsila-e-ahl-e-chisht mein

zindan se ankhen senkne us gul ke ghar gae

dozakh se ag lene chale ham bahisht mein

begane ik hamen nazar ae pas-e-fana

be dardon ka hujum hai bagh-e-bahisht mein

but khane mein safedi-e-husn-e-farang hai

garje ki raushni hai sawad-e-kinshat mein

jal jal ke khak hote hain be ashk-o-ah ham

ab-o-hawa nahin hai hamari sarisht mein

garmi mein tere kucha nashinon ke waste

pankhe hain qudsiyon ke paron ke bahisht mein

sona kasaon ashrafi dagh sajda ka

sang-e-mahak lagaun banae kinshat mein

bijli chamak gai jo hansi mein pharak gae

shokhi bhari hui hai tumhari sarisht mein

taswiren teri dast-e-hinai ki le gae

chhape lahu ke ham ne lagae bahisht mein

karti hain khun-e-charkh buton ki taalliyan

rang-e-shafaq lagati hai saqaf-e-kinshat mein

abr-e-bahar jauhar-e-shamshir-e-yar the

gulhae zakhm khul gae uradi bahisht mein

taqdir mein hai teri dahan-o-kamar ka ishq

sar-e-nihan likha hai miri sar nawisht mein

di jan ek hur ke bose ki chat par

qismat ne mujh ko zahr diya hai bahisht mein

choron se guftugu-e-khat-e-sabz yar hai

tuti kisi ka bol raha hai bahisht mein

adna ghulam shah-e-wilayat hue munir

dasht-e-najaf ki khak hai meri sarisht mein