کعبے کا شوق ہے نہ صنم خانہ چاہئے

کعبے کا شوق ہے نہ صنم خانہ چاہئے

جانانہ چاہئے در جانانہ چاہئے

ساغر کی آرزو ہے نہ پیمانہ چاہئے

بس اک نگاہ مرشد مے خانہ چاہئے

حاضر ہیں میرے جیب و گریباں کی دھجیاں

اب اور کیا تجھے دل دیوانہ چاہئے

عاشق نہ ہو تو حسن کا گھر بے چراغ ہے

لیلیٰ کو قیس شمع کو پروانہ چاہئے

پروردۂ کرم سے تو زیبا نہیں حجاب

مجھ خانہ زاد حسن سے پردا نہ چاہئے

شکوہ ہے کفر اہل محبت کے واسطے

ہر اک جفائے دوست پہ شکرانہ چاہئے

بادہ کشوں کو دیتے ہیں ساغر یہ پوچھ کر

کس کو زکوٰۃ نرگس مستانہ چاہئے

بیدمؔ نماز عشق یہی ہے خدا گواہ

ہر دم تصور رخ جانانہ چاہئے

kaabe ka shauq hai na sanam khana chahiye

janana chahiye dar-e-janana chahiye

saghar ki arzu hai na paimana chahiye

bas ik nigah-e-murshid-e-mai khana chahiye

hazir hain mere jeb-o-gareban ki dhajjiyan

ab aur kiya tujhe dil-e-diwana chahiye

ashiq na ho to husn ka ghar be charagh hai

laila ko qais shama ko parwana chahiye

parwarda-e-karam se to zeba nahin hijab

mujh khana zad-e-husn se parda na chahiye

shikwa hai kufr ahl-e-mohabbat ke waste

har ik jafa-e-dost pe shukrana chahiye

bada kashon ko dete hain saghar ye puchh kar

kis ko zakwat nargis-e-mastana chahiye

bedam namaz-e-ishq yahi hai khuda gawah

har dam tasawwur rukh-e-janana chahiye