بہے ساتھ اشک کے لخت جگر تک

بہے ساتھ اشک کے لخت جگر تک

نہ کی اس نے مری جانب نظر تک

عبث صیاد کو ہے بد گمانی

نہیں بازو میں اپنے ایک پر تک

خبر آئی مریض درد و غم کی

کہیں پہنچے خبر اس بے خبر تک

نزاکت سے لگی بل کرنے کیا کیا

ابھی گیسو نہ پہنچے تھے کمر تک

جئے جاتے ہیں شکل شمع سوزاں

نہ کچھ باقی رہیں گے ہم سحر تک

اگر میں یاد ہوتا تو نہ آتے

مگر بھولے سے آئے میرے گھر تک

دم گریہ تھی غالب ناتوانی

پہنچتے لخت دل کیا چشم تر تک

خدا جانے اثرؔ کو کیا ہوا ہے

رہا کرتا ہے چپ دو دو پہر تک

bahe sath ashk ke lakht-e-jigar tak

na ki us ne miri janib nazar tak

abas sayyad ko hai bad gumani

nahin bazu main apne ek par tak

khabar ai mariz-e-dard-o-gham ki

kahin pahunche khabar us be khabar tak

nazakat se lagi bal karne kya kya

abhi gesu na pahunche the kamar tak

jiye jate hain shakl-e-sham-e-sozan

na kuchh baqi rahenge ham sahar tak

agar main yad hota to na ate

magar bhule se ae mere ghar tak

dam-e-girya thi ghalib natawani

pahunchte lakht-e-dil kya chashm-e-tar tak

khuda jane asar ko kya hua hai

raha karta hai chup do do pahar tak